Биылғы жылы Зайсан қаласының Заречный мөлтек ауданындағы көп қабатты үйлерді табиғи газбен жылытатын жылу қазандығының құрылыс жұмыстары басталған болатын. Ал шілде айының 1-і күні аудандағы 8 ауылға ауылішілік газ желілерін тарту жұмыстары басталды.
Зайсан ауданы әкімдігінің баспасөз қызметінің мәліметіне сүйенсек, аудан тұрғындары көгілдір отынды үздіксіз әрі арзан бағада пайдаланып келеді. Бұл қазіргі бағаның шарықтап тұрған кезінде аудан тұрғындары үшін үлкен жеңілдік болып отыр. Бірер ай бұрын Зайсанның алғашқы барланған газ қорының азайғаны жөнінде мәселе көтеріліп, арнайы комиссия құрылып, оның шешімімен ҚХР-ға газ беру уақытша тоқтатылған болатын.
Жақында «Сарыбұлақ» газ кені орнында өткен комиссия отырысында «Тарбағатай Мұнай» компаниясының ҚХР-ға 75 млн текше метр газ беру жөніндегі ұсынысы қаралды. Комиссия отырысында мәселе жан-жақты талқыланып, нәтижесінде ҚХР-ға газ беру жөніндегі «Тарбағатай Мұнай» компаниясының ұсынысы аудан халқының келісімімен ғана қабылданатыны туралы шешім шығарылды.
Зайсан ауданы әкімдігінің мәліметінше, ҚХР-ға газ берілетіні жөнінде әлеуметтік желілерде қайтадан қауесет-әңгімелердің көбеюіне байланысты аудан тұрғындарының назарына табиғи газ экспортының тоқтап тұр. ҚХР-ға газ беру мәселесі тек қоғамдық тыңдаулар өткізу арқылы аудан халқының келісімімен шешілетін болады. Онсыз ҚХР-ға газ беру жұмыстары қайта басталмайды. Ал ішкі нарықтағы аудан тұрғындарына табиғи газ беру жұмыстары тоқтатылмайды. Қоғамдық тыңдауларды өткізу уақыты және орындары туралы хабарландырулар ақпарат құралдарында жарияланады.
Талшын ҚАЛИАСҚАР
