Шәкәрім университетінің ескерткіш алаңында Ұлы Даланың дарыны, ақын, жазушы, философ, тарихшы, композитор, Абаймен замандас, әрі інісі, әрі ол негізін салған реалистік әдебиет дәстүрлерін алға апарушы ізбасары Шәкәрім Құдайбердіұлының туған күнінде ескерткішіне тағзым етіп, гүл қою рәсімі өтті. Өзі өмір сүрген ортаның қоғамдық-саяси және әлеуметтік сыр-сипаттарын көре білуде, қоғам мен адам табиғатындағы кемшіліктерді зерделеуде, туған халқына түзу жол көрсетуде Шәкәрім Құдайбердіұлы Абай бағытын ұстанды.
— Бүгін Ұлы мереке, бабамыз Шәкәрімнің туған күні. Бұл атаулы дата Құрбан айттың соңғы күніне келіп тұр. Күні кеше ғана өзінің шығармаларымен танымал болған Шәкәрімді бүгін жұрт аялап, ардақтап, төбесіне көтеруде. Өйткені, Абай бабамыздан кейінгі Шәкәрімнің айтқан философиялық ойлары, артына қалдырған үлкен мұрасын мол сабақ деп білемін. Ақынның туған күні құтты болсын! Шәкәрімнің қалдырған өсиеттерін кейінгі ұрпақ ары қарай жалғастырсын, — деп Абай ауданының құрметті азаматы Мұрат Сейсенұлы өзінің тілегін білдірді.
Көрнекі ақын, тамаша жазушы, білікті аудармашы, ойшыл философ, білімдар тарихшы, сыршыл сазгер Шәкәрім Құдайбердіұлына тағзым етіп, Ұлы ақын ескерткішіне гүл шоқтарын қою рәсіміне қала әкімі орынбасары Айдар Садырбаев, қаланың зиялы қауымы, университет профессор-оқытушылар құрамы мен түлектері қатысты.
— Шәкәрім бабамыздың қасиетті есіміне басымызды иіп, асыл сүйегі, бай мұрасының алдында тағзым жасау үшін жиналып отырмыз. Жылдағы дәстүр бойынша бұл күнді Шәкәрім бабамыздың жерлестері Ұлы ақынымыздың аруағына тағзым жасау үшін жиналумен бастайды. Өкінішке орай, бабамыздың шерлі, мұңды тағдыры әрқайсымыздың жадымызда сайрап жатыр. Ұрпағым деп ұлы мұратқа ұмтылып, баз кешкен ұлы даланың төл перзенті бүгінгі күні заңғар биікте әрқайсымызға шапағатшы болып тұр деп есептеймін. Олай болса, бүгінгі іс-шара өзінің мақсатына жетіп, Шәкәрім мұрасын мұқият зерделеп, қаперіне түйген ұрпағымыз көп болсын! Шәкәрім бабамыздың атындағы іргелі оқу орнының түлектері еліміздің көк туын асқақтатып, өзге мемлекеттермен тең дәрежеде дамуы жолында аянбай қызмет етсін деп тілеймін, бабамыздың аруағы риза болсын! – деп игі лебізін білдірді қала әкімі орынбасары Айдар Садырбаев.
Шәкәрім бабамызға гүл қою үшін ақын атындағы университет түлектері мен студенттері, қала қонақтары қатысып, өздерінің баба рухына деген құрметтерін көрсетті.
Дана ТАЛҒАТБЕК
