Халықаралық «Қазақ тілі» қоғамының жауапты хатшысы, өлкетанушы Ертіс Нұрқасым жалғыз өзі тарихи велоэкспедицияға аттанды.
Веложорықты Қаракерей Қабанбай батырдың 330 жылдығына және Ахмет Байтұрсынұлының 150 жылдығына орай Халықаралық «Қабанбай» қоры және Халықаралық «Қазақ тілі» қоғамы ұйымдастырып отыр.
Экспедиция қазақ тілін дамыту, ел тарихын жаңғырту және ұлттық рухты көтеруге ықпал ету мақсатында ұйымдастырылған.
Жорықшы Абай облысының киелі жерлері арқылы жүріп өтпек, алдымен Қоңыр әулие үңгіріне бет алмақ. Осы жерде Қабанбай батыр Абылай ханнан «Дарабоз» және «Хан батыр» атақтарын алған. Сондықтан бұл киелі орын үлкен тарихи маңызға ие және ұлы батырдың құрметіне арналған экспедицияға тікелей қатысы бар. Ал келесі аялдама — Үржар ауданындағы Ойран жазығы. Ал бұл жерде жоңғарлармен болған ең соңғы шайқастардың бірі өткен.
Өлкетанушы өз велосапарын Семей қаласынан бастап, Үржар ауданының Қабанбай ауылы мен Алакөлде аяқтайды.
— Биыл Қабанбай бабамыздың туғанына 330 жыл, халық жерін жаудан қорғаған батырын ешқашан ұмытпайды. Мен не себептен осын жорыққа атанғалы отырмын? Кезінде Абылай хан, Қабанбай, Бөгенбай сынды бабаларымыз қазақты жер бетінен жойып жібермек болған жоңғарлардан ұлан-ғайыр жерімізді қорғап қалып, мына біздерге аманат етіп кетті. Жер мен тіл — сатылмайтын байлық. Жерімізді сақтап қалған ұлы бабаларымызды, өткен таихымызды бүгінгі ұрпақ білуі үшін біз олардың есімдерін ұлықтауымыз керек, үлгі көрсетуіміз керек.
Ертіс Нұрқасым осыған дейін мұндай сапарларға көлікпен шыққан екен. Бірақ батырлардың рухын сезіну үшін осы жолғы сапарына велосипедпен шығуды жөн көргенін айтады.
Ерасыл КЕНЖЕБЕК,
«Семей таңы»
