Президент Қасым-Жомарт Тоқаев Үкімет отырысында елде біртұтас автожол компаниясын құруды тапсырды
Тоқаев Қазақстандағы автожол саласына түбегейлі реформа жасайтын уақыт келгенін мәлімдеді.
«Қазір еліміздегі жолдың жай-күйін қадағалап, қызмет көрсететін екі негізгі оператор бар. Турасын айтсақ, екеуі де бір жұмысты атқарып отыр, жұмысшыларының саны да қажетті шамадан артық», – деді президент.
Қасым-Жомарт Кемелұлы елде екі компания жұмыс істегенімен, тұрғындардан түсетін арыздың азаймай тұрғанын қосып өтті.
«Ал жолдың сапасы мүлде сын көтермейді. Үкіметке «ҚазАвтоЖол» және «Казахавтодорды» біріктіріп, Қазақстанның біртұтас автожол компаниясын құруды тапсырамын. Нәтижесінде қызметкерлердің саны да қысқаратын болады», – деп қосты ол.
