«Саламатты Қазақстан» медициналық пойызы Абай облысындағы өз жұмысын апта дүйсенбісінен бастады. Алматы облысынан жеткен денсаулық пойызы ең алдымен Жарма ауданындағы станцияларда аялдады.
Еске сала кетсек, мамандандырылған медициналық пойыз өз жұмысын ағымдағы жылдың 20 маусымынан бастаған болатын. «Саламатты Қазақстан» медициналық пойызы жобасының басты мақсаты — сапалы медициналық қызметке қол жеткізе алмайтын шалғай станциялар мен оларға жақын орналасқан ауылдардың тұрғындарын медициналық тексеруден өткізу және диагностикалау.
11 шілде күні арнайы пойыз жаңадан құрылған Абай облысына келіп жетті. Дәрігерлер Жарма станциясында екі тәулік жұмыс істеген соң, 13-17 шілде аралығында Жаңғызтөбе станциясында, 25-26 шілде аралығында Суықбұлақ, 27-28 шілдеде Белағаш станцияларында және 29-30 шілдеде шекара түбіндегі Ауыл станциясында тұрғындарды қабылдамақ.
Консультациялық-диагностикалық пойызда терапевт, педиатр, офтальмолог, невропатолог, хирург, уролог, стоматолог мамандар таңғы 9-дан кешкі 18-ге дейін ауыл тұрғындарының денсаулығын тексеріп, кеңестер береді.
Пойыз пациенттерді қабылдауға толық бейімделген, арнайы жабдықталған УДЗ-диагностика, стоматология купелері де бар.
Айта кетейік, медициналық қызмет тегін көрсетіледі. Медсақтандыру қорына жарна төлеу міндетті емес, жеке куәлік болса жеткілікті.
«Саламатты Қазақстан» пойызы еліміздің барлық облыстарын аралап, 67 шалғай станцияға барады. Жобаға «Самұрық-Қазына» АҚ компаниялар тобының атынан «Samruk-Kazyna Trust» әлеуметтік жобаларды дамыту қоры қаржылай қолдау көрсетіп отыр. Жоба ҚР Денсаулық сақтау министрлігінің қатысуымен, «Қазақстан темір жолы» ҰК АҚ жанындағы «Әлеуметтік жобалар қоры» корпоративтік қорымен бірлесіп іске асырылуда
Азамат ЕРСАЙЫН,
«Семей таңы»
