Шығыс Қазақстан облысы прокуратурасының алқа отырысында атмосфералық ауаны қорғау туралы заңнама саласындағы заңдылықтың жай-күйі және осы бағыттағы уәкілетті мемлекеттік органдар қызметінің тиімділігі мәселелері қаралды.
Жиынға облыс әкімінің орынбасары Ержан Нұрбаев, құзырлы мемлекеттік мекемелердің басшылары, табиғат пайдаланушы ірі компаниялардың өкілдері қатысты.
— Шығыс Қазақстан түсті металлургия мен тау-кен өндіру өнеркәсібін дамытудың зор әлеуетіне ие. Өңірде 600-ден астам кәсіпорын және 100-ден астам ірі кәсіпорын жұмыс істейді. Алайда бұл қоршаған ортаға елеулі зиян келтіреді. Жүргізілген талдау көрсеткендей, өндірістік компаниялардың табиғатты қорғау іс-шараларын қаржыландыруына және уәкілетті мемлекеттік органдардың экологиялық заңнаманы қамтамасыз ету жөніндегі жұмыстарына қарамастан, кемшіліктер орын алуда, — деді облыс прокуроры Алмат Байшолақов.
Алмат Байшолақовтың айтуынша, ірі өндірістік кәсіпорындар болғанына қарамастан, Жаңа-Бұқтырма және Жезкент кенттерінде «Қазгидромет» РМК атмосфералық ауаның жай-күйіне сапалы мониторинг жүргізбейді. Облыс орталығындағы бақылау бекеттері дұрыс орналаспаған.
— Елді мекендер шегінде атмосфералық ауаға және көгалдандыруға қойылатын талаптарды реттейтін қажетті нормативтік-құқықтық актілер жоқ. Ауылдарды көгалдандыру жұмыстары ретсіз жүргізіледі. Жергілікті атқарушы органдар 2022-2024 жылдарға арналған табиғатты қорғау іс-шараларының жоспарына Өскемен, Семей және Риддер қалаларында атмосфералық ауаны қорғау жөніндегі іс-шараларды енгізбеген, — деді өз сөзінде А.Байшолақов.
Автокөліктер де экологияға айтарлықтай залал келтіреді. Облыс аумағында тіркелген 342 мың көліктің 252 мыңы 10 жыл бұрын шығарылған.
Барлық анықталған бұзушылықтар бойынша облыс прокуратурасымен прокурорлық қадағалау актілері енгізілді. Отырыс қорытындысы бойынша, мемлекеттік органдар мен ұйымдардың алдына нақты міндеттер қойылды. Облыс әкімінің атына жалпы жағдай туралы ақпараттық хат жолданды. Өндірістік кәсіпорындарға қолайсыз метеожағдайлар күндері өндіріс көлемін және атмосфераға ластаушы заттар шығарындыларын азайту шараларын қабылдау ұсынылды. Бұл бағыттағы жұмыстар алдағы уақытта да жалғасады.
Шығыс Қазақстан облысының прокуратурасы
