Жаз басталғалы ШҚО-да өзен-көл жағалап, суға түсуге асыққан адамдардың саны көбейді. Өкінішке орай, қайғылы жағдайлар да жиіледі. Шомылу маусымы ашылғалы бері аймақта 15 адам суға кеткен, оның 2-уі — бала.
Жаз басталғалы ШҚО ТЖД мамандары су айдындарында 2667 рейд және патрульдеу жүргізді, демалушыларға жаднамалар мен ұсынымдар таратты. Жергілікті атқарушы органдармен бірлесіп, қауіпті учаскелерді көрсете отырып, 314 тыйым салу белгісін орнатты. Алайда азаматтардың суға кетіп, қаза болу жағдайлары азаймай тұр. Көбінесе адамдардың немқұрайлығынан және ескертулерді елемеуінен осындай оқиғалар орын алуда.
— Құтқарушылар, полицейлер мен демалушылар төтенше жағдайға тап болған 11 азаматқа дер кезінде көмекке келді. «Біздің ұсыныстарымыз бен тыйым салу белгілеріне қарамастан, азаматтар қаупі жоғары жерлерде жүзуді жөн көреді. Бұл ағыны күшті, су түбі тексерілмеген, жақын жерде құтқарушылар жоқ аумақтар»,- деді ШҚО ТЖД бастығының орынбасары Арман Тоқанов.
Сондай-ақ полиция мамандарының қатысуымен жыл басынан бері ҚР ӘҚБК-нің 440 – бабы («Алкогольдік ішімдіктер ішу немесе қоғамдық орындарға масаң күйде келу») бойынша 479 азамат және 364 – бабы («Қоғамдық суды пайдалану ережелерін бұзу») бойынша 205 демалушы әкімшілік жауапкершілікке тартылды.
«Бірақ тәуекел етіп, суда жүзіп жүргендер тоқтамайды және қауіпсіздік шараларын бұза отырып жүзуді жалғастырады. Қаза тапқандардың статистикасы өсуде. ШҚО ТЖД құтқарушылары азаматтарды қырағылық танытуға және демалу үшін тек шомылуға рұқсат етілген орынды таңдауға шақырады», — делінген департамент таратқан ақпаратта.
Н.СӘЛІМБЕКҚЫЗЫ
