Семейде жаңа оқу жылында екі мектеп пайдалануға беріледі. Шығыс кентінде 1200 орынға арналған, Степной кентінде 300 орынға арналған мектептер оқушыларға есігін ашады. Бұл туралы облыс әкімі Нұрлан Ұранхаев құрылыс нысандарын аралаған кезде мәлімдеді.
Аймақ басшысы Семей қаласындағы мектептер мен көп пәтерлі үйлердің құрылысымен танысты. Облыс басшысының бірінші барған жері Степной кенті болды. Бүгінде онда 300 орындық мектептің құрылысы жүргізілуде.
«Қазіргі таңда әрлеу жұмыстары жүргізілуде. 1 қыркүйекке дейін барлық жұмыстар аяқталады. Жылумен жабдықтау желілері бойынша проблемалар бар», — дейді мердігер компания өкілдері.
Сондай-ақ өңір басшысы Шығыс кентіндегі 1200 орынға арналған мектеп құрылысымен танысты. Мұнда құрылыс жұмыстары аяқталуға жақын.
Облыс басшысы аталған мектепте үлкен спорт залы бар екенін айтып, оқушылар арасында спортты дамытудың маңыздылығын атап өтті.
Нұрлан Ұранхаев Қарағайлы шағын ауданындағы тоғыз қабатты тұрғын үй құрылысының барысымен де танысты. Жылу желілеріне қатысты біраз проблемалар бар. Оларды жақын арада шешу керек. Облыс әкімі бейінді басқармалар мен бөлімдерге жұмыс барысын бақылауды тапсырды
Абай облысының әкімдігі
