Өткен аптада Семей қаласының әкімі Бақытжан Байахметов Мирный, Затон, Қарағайлы, Силикатный кенті, Энергетик, Северный, 343-квартал шағын аудандарының тұрғындарымен кездесу өткізді.
Кездесуде шаһар басшысы қаланың 6 айдағы әлеуметтік-экономикалық даму қорытындыларымен таныстырып, жалпы Семейде алдағы уақытта атқарылатын жұмыстар жайлы, сонымен қатар аталған шағын аудандарды дамыту перспективалары туралы айтып берді.
Қала басшысының айтуынша, 6 айдағы әлеуметтік-экономикалық даму қорытындылары оң динамиканы көрсетіп отыр.
2021 жылы жылумен жабдықтау объектілеріне жөндеу жүргізіліп, «Орталық», «Ғаббасов», «35 квартал», «103-103А» қазандықтарының қолда бар қуаты 71 Гкал/сағатқа ұлғайтылды. Ұзындығы 3,57 шақырым болатын оң жағалаудың жылу желілері ауыстырылды. «Дорожник» қазандығынан № 38 орта мектепке дейін ұзындығы 1,3 шақырым болатын жылу желілері салынды. Жөндеу жұмыстары 2021-2022 жылдардағы жылу беру маусымын үзіліссіз өткізуге мүмкіндік берді. Жылу көздерін алдағы жылыту маусымына дайындау үшін ағымдағы жөндеуге қажетті қаражат бөлініп, тиісті жұмыстар атқарылуда.
Өткен жылы 13 көшеге құм-қиыршық тас қоспасы және қиыршық тас себіліп, грейдерлеу жұмыстары жүргізілді. Қарағайлы шағын ауданында жалпы ұзындығы 3,4 шақырым болатын кварталішілік жолдар салынды. Ал 6 көше жөндеуден өткізілді.
Омбы-Майқапшағай автожолынан бастап «Северный» көліктік-логистикалық орталығынаа дейінгі автожол құрылысы бойынша жобалық-сметалық құжат әзірленіп, сараптамаға жіберілген.
Таза ауыз сумен қамтамасыз ету жұмыстары жалғасуда. Аталған шағын аудандарда 20 мыңнан астам тұтынушыға қызмет көрсетіледі. Желілердің негізгі бөлігі 70-ші жылдары салынғандықтан, су құбыры желілерінің 66,4%–ы, кәріз желілерінің 72,7%-ы тозған. Қаланың оң жақ жағалауындағы ауыз судың сапасын жақсарту мақсатында «Нұрлы жол» мемлекеттік бағдарламасы аясында «Затон» су қабылдағышы қайта жаңартылды. Аталған аудандарда 33 су тарату колонкасы орнатылған. Биыл «Семей Водоканал» МКК өз қаражаты есебінен Энергетик кентіндегі Жаңа-ауыл көшесіндегі су құбырына күрделі жөндеу жүргізуді жоспарлап отыр.
Қазіргі күні қаланың оң жақ жағалау бөлігіндегі жылу қуатының тапшылығын жою үшін 14,1 Гкал/сағ су жылыту қазандығын орната отырып, «Зооветинститут» қазандығын реконструкциялау бойынша жоба әзірленуде.
Көше жарығын жаңғырту жұмыстары да жалғасуда.
Өткен жылы жалпы қала бойынша 188 көше, оның ішінде Мирный, Затон, Силикатный кенттеріндегі Тері комбинаты, Матросский тұйық көшесі, Шугаев көшелері жарықтандырылды. Жыл соңына дейін 4 көше — 5-ші өткел, 8-ші өткел (Северный кенті); Ақкөл (Мирный кенті), Энергетик көшесі орталық жолдан соңғы аялдамаға дейін жарықтандырылмақ.
2023 жылы аталған аудандарда жарығы жоқ тағы 24 көшені жарықтандыру жоспарлануда. Биыл Шугаев көшесіндегі 155, 169, 171-үйлердің 1 ауласы абаттандырылады. Сонымен қатар Мирный, Северный кенттерінде және Шугаев көшесіндегі 159-үйдің ауласында балалар алаңдарын орнатуға келісімшарттар жасалды.
Энергетик кентінде көпфункционалды алаң орнатуға, сондай-ақ 5 балалар және 5 спорт алаңын орнатуға конкурстық рәсімдер жүргізілуде.
Білім беру саласында 9 жалпы орта білім беретін мектеп жұмыс істейді. 3 мектепте (№2, 9, 25) 1486,5 орын, 4 мектепте 327,5 орын жетіспейді (№8,15, 18, 26) байқалады.
Болашақта (2023-2024 жылдары) Қарағайлы ауданында 1200 орындық орта мектеп, 320 орындық 2 балабақша салу жоспарланған.
Жолаушылар тасымалы саласында тұрғындарға 33 қалалық маршрут бойынша қызмет көрсетіледі. Қазіргі уақытта Семей қаласы әкімдігінің «Семей қаласының аумағында жолаушылар мен жүк тасымалын автомобильмен қалалық тұрақты тасымалдаудың маршруттық желісі туралы» қаулысына өзгерістер енгізу рәсімі жүргізілуде.
Болашақта 7 шағын ауданды белсенді дамыту жоспарлануда.
Болашақта 52 көп пәтерлі тұрғын үй, Қарағайлы тұрғын ауданында 1200 орындық мектеп, инновациялық мектеп, Мұз модулі, үстел теннисі орталығы, 3 балабақша салынады, 5 жылумен жабдықтау нысанын жаңғырту бойынша жұмыстар, Еуропа қайта құру және даму банкі шеңберінде 30 көшені, Омбы — Майқапшағай автомобиль жолын «Северный» көліктік – логистикалық орталығына дейін жарықтандыру жұмыстары жүргізіледі.
Жиын соңында қала әкімі Бақытжан Байахметов тұрғындардың сұрақтарына жауап берді.
Ерасыл КЕНЖЕБЕК,
«Семей таңы»
