Елімізде маусым айынан бері коронавирус инфекциясын жұқтыру жағдайлары қайта көбейіп келеді. Соңғы аптада КВИ-мен сырқаттанушылық 3,2 есе өскен. Инфекция жұқтырғандардың көбі екпе алмаған және соңғы 6 айда ревакцинациядан өтпеген. 19 шілдеде елімізде 1959 адамнан, оның ішінде Абай облысында 27 тұрғыннан коронавирус анықталды.
Ал Семей қаласындағы эпидемиологиялық жағдай қалай? Бұл сұраққа қалалық эпидемиологиялық қадағалау басқармасының санитарлық-эпидемиологиялық қадағалау және бақылау бөлімі басшысының міндетін атқарушы Айнұр Серікбаева жауап берді.
Айнұр Серікбаеваның айтуынша, 30 маусымнан бастап қалада коронавирус инфекциясын жұқтыру жағдайлары тіркеле бастаған. 30 маусым мен 18 шілде аралығында КВИ инфекциясының 79 жағдайы анықталды. Ал маусым айында ауруға шалдыққандар тіркелмеген.
— Қалыптасқан эпидемиологиялық жағдайға байланысты ел аумағында вирустың таралуының алдын алу туралы Қазақстан Республикасының аумағында коронавирус инфекциясының таралуына жол бермеу жөніндегі ведомствоаралық комиссияның хаттамалық шешіміне сәйкес 5 шілдеден бастап қоғамдық көліктерде (оның ішінде әуе, темір жол, халықаралық автобус тасымалдары) тұрғындарға бетперде кию міндеттелді. Семей қаласы тұрғындарына әлеуметтік арақашықтықты сақтау, сондай-ақ жіті респираторлық вирустық инфекция жұқтырған науқастармен байланыста болған жағдайда, медициналық мекемелерге барған кезде бетперде режимін сақтау ұсынылады. ПТР тесті оң нәтиже көрсеткен жағдайда үй карантинін сақтау қажет. Маскалар әр 3 сағат сайын ауыстырылуы керек, -деді Айнұр Серікбаева.
12-18 шілде аралығында қалада 63 жағдай тіркелген. Семей қаласы бойынша өсу қарқыны тәулігіне 0,01 пайызды, аптасына 0,3 пайызды құрады. Жалпы, 18 шілдедегі жағдай бойынша, Семей қаласында 65 науқаспен байланыста болған 52 адам бақылауда тұр. 9 адам үй карантинін аяқтады. Коронавирус диагнозымен 9 науқас жұқпалы аурулар ауруханасына стационарлық емдеуге жатқызылған. Қала бойынша төсек-орынның қамтылуы 6,2 пайызды құрайды.
— Қауіпті инфекцияның елімізде таралуының алдын алу мен одан қорғанудың және коронавирустың ауыр салдарынан сақтанудың ең тиімді жолы вакцинация және ревакцинация екені белгілі. Бүгінгі күні қаламызда тұрғындарға QazVac вакцинасы салынуда. Екпе тегін жүргізіледі, кез келген адам вакцинаны өзі тұратын аудандағы емханаға барып ала алады, — дейді Айнұр Серікбаева.
Айнұр Болатқызы вакцина алмағандар ауруға жиі шалдығып жатқанын айтып, халықты вакцинация мен ревакцинациядан өтуге шақырды.
Талшын ҚАЛИАСҚАР,
«Семей таңы»
