Абай облысы аумағында орналасқан Алакөл туристік аймағы «Туризмді дамыту — 2025» бағдарламасы аясында әзірленген еліміздің туризмді дамыту картасының үздік ондығына кірді.
Алакөл — Абай облысының ең танымал туристік орындарының бірі. Оның үздік он туристік аймақтың қатарына енуі кездейсоқ жайт емес. Мұнда бір мезетте 13 225 адамды қабылдай алатын 207 демалыс базасы бар. Былтыр бұл үйлерде демалушылар үшін 199 885 төсек-орын берілді. Жалпы, мұндағы демалыс үйлерінің саны жыл санап артып келеді. Мәселен, биылғы жылы тағы да 960 адамға арналған 13 жаңа демалыс базасы жаңадан салынды. Бұл көрсеткіш алдағы уақыттарда да арта беретіні анық. Себебі көл басында кәсіп ашып, нәпақа тауып жүрген азаматтарға қолайлы жағдай жасалған.
Бүгінде Алакөлдің жағалауының инфрақұрылымы едәуір дамыған. Көл аумағында қазіргі күні 41 сауда үйі, 83 шағын бутик, 40 қоғамдық асхана, үш дәріхана жұмыс істеп тұр.
Сонымен қатар осыдан біраз уақыт бұрын ашылған туристерге тегін ақпараттық кеңес беру қызметін көрсететін «TOURIST INFO» ақпараттық орталығы бар.
Алакөл аумағында төрт құтқару мұнарасы мен шағын кемелер аялдайтын орындар бар. Киім ауыстыру үшін 15 кабина орнатылып, 11 санитарлық-гигиеналық орын қолданысқа берілген.
Естеріңізге сала кетейік, 2021 жылы көл жағалауында алаңдар түзетіліп, бөлшек тастар орнатылды, «Турист Инфо» ғимараты мен LED-экран жөндеуден өтіп, көгалдандыру жұмыстары жүргізілді. Қазіргі уақытта Алакөл көлінің аумағын интернет қызметтерімен қамтамасыз ету бойынша шаралар жасалуда.
Өткен аптаның соңында ғана Үржар ауданына жұмыс сапары барысында облыс әкімі Нұрлан Ұранхаев Алакөл жағалауына барып қайтқан болатын. Алдағы уақытта да аймақтың инфрақұрылымы жаңаланып, көлдің туристік әлеуетін арттыру жұмыстары жалғаса беретін болады. Соның ішінде демалыс үйлерінің және демалушылардың қауіпсіздігі де күшейтілмек. Бұл орайда Нұрлан Тельманұлы аудан әкіміне тиісті тапсырмалар берді.
Әлібек КЕМЕЛХАН,
«Семей таңы»
