Семей қаласының әкімі, «AMANAT» партиясының Семей қалалық филиалының төрағасы Бақытжан Байахметов азаматтарды жеке сұрақтары бойынша қабылдады.
Қабылдауға келген тұрғындар тарапынан түрлі мәселелер қозғалды. Қазбек Бердікенов есімді азамат 2019 жылдан бастап «Уба» шипажайына жолдама ала алмай жүргенін айтып, осы мәселеде көмек көрсетуді сұрап келді.
Ал төрт бала тәрбиелеп отырған жалғыз басты ана Гүлжан Төреханова балаларының денсаулығына алаңдаулы, себебі, айтуынша, олардың үйінде ылғал пайда болған, осы мәселені анықтау үшін арнайы комиссия жіберуді өтінді.
Қуаныш Изатов пен Назира Амангелдина — алты баланы тәрбиелеп отырған ерлі-зайыптылар. Қазіргі таңда жетінші баланы күтіп жүр. Ерлі – зайыптылар үйлеріне электр желісін тартып беруді сұрады, сымдар мен тіректер бар.
Қабылдауда болған келесі тұрғын — Әсемғали Демеубай меншігіндегі жер учаскесін заңдастыруға көмек көрсетілсе дейді. Оның айтуынша, оған тиесілі учаскені өзге азамат тартып алмақшы, жер теліміндегі бағаналарды алып тастап, өз қазықтарын орнатпақ. Оның қолында 2015 жылы берілген жер учаскесін таңдау актісі, 2016 жылғы хаттамалық шешім (3 жыл мерзімге), 2020 жылы берілген жер учаскесі шекарасының жобасын тоқтата тұру туралы хабарлама (ахуалдық жоспар) бар.
Дархан Жұмаділов — өзіне тиесілі шаруашылығы бар жеке кәсіпкер. Ол жер (жайылым) мәселесін қозғады.
Ал Динара Ортбаева мен Салтанат Толыбаеваның 3-4 айдан бері үйлерінде су болмағандығын жеткізіп, ұңғыма бұрғылауға көмектесуді өтінді.
Марина Удовенко мен Рысбике Байшенова Әуезов даңғылындағы алты үйді орталықтандырылған жылуға қосу мәселесін шешіп беруді өтінді.
Шығыс кентінің тұрғындары Елена Филатова, Алексей Веретельников және Сергей Лукин үйлерін су басып жатқанын айтып, қолдау көрсетуді сұрады. Олардың айтуынша, су жайылатын себебі арықтар тазаланбайды және тереңдігі 20 см ғана, сондықтан 50-80 см-ге дейін жеткізіп қайта қазу керек. Сонымен қатар арыққа қоқыс тастайтындарға айыппұл салуды сұрады.
Бұл күні қабылдауға келген тағы бір тұрғындар көлік мәселесін қозғады. Ал Арман Мамырбек Алакөл көліне жолдама алуға қолдау көрсетуді сұрады.
Бақытжан Байахметов тиісті бөлімдерге тұрғындар тарапынан айтылған барлық мәселелерді бақылауға алып, оларды шешу жолдарын қарастыруды тапсырды.
Семей қаласы әкімінің баспасөз қызметі
