Қала әкімдігінде өткен кезекті отырыста жылыту маусымына дайындық жұмыстары және дебиторлық берешекті қайтару мәселелері талқыланды.
Жиында айтылғандай, бюджеттік ұйымдар мен мекемелердің берешегі дебиторлық берешектің жалпы сомасының 50 пайызын құрайды. Басты проблема ірі борышкерлердің қарызын қайтаруға қатысты болып отыр. Тұтынылған жылуға ақысын төлемей отырған ұйымдардың бірі — «Еңбек — Өскемен» республикалық мемлекеттік кәсіпорны, берешегі 181 283 мың теңгені құрайды.
Дебиторлық берешекті қайтару үшін тиімді жұмыс жұмыс жүргізу керек. Ол үшін 10 — 31 шілде аралығында күн сайын, бекітілген кестеге сәйкес, учаскелік инспектор мен бұқаралық ақпарат құралдары өкілдерінің қатысуымен рейдтер өткізіліп, борышкерлерге жылу энергиясынан ажыратылатыны туралы ескертіледі. Сондай-ақ атқарушылық жазбаны ресімдеу үшін 3 нотариус және атқарушылық іс жүргізу үшін қазандық аумағы бойынша бекітілген 6 жеке сот орындаушысы жұмыс істейді.
— Ай сайын кешкі уақытта, кестеге сәйкес, ағымдағы айдың 15-нен 31-не дейін «Теплокоммунэнерго» мекемесі өкілдері мен сот орындаушысы борышкерлердің пәтерлерін аралайтын болады.
Жылу ақысын 2 айдан артық уақыт төлемеген абоненттер бойынша 2022 жылғы 1 қаңтардан бастап 216,7 млн теңгені құрайтын берешекті өндіріп алу үшін 4 912 талап рәсімделді. «Теплокомунэнерго» МКК менеджерлері борышкерлерге жылудан ажыратылатыны және іс қозғалатыны туралы және берешекті мәжбүрлеп өндіріп алу үшін сот органдарына жіберілетіні туралы ескертулер береді.
— Күн сайын телефон арқылы борышкерлерге қоңырау шалынып, қарыздары туралы ескертіледі және берешек сомасын төлеуге өтініш жасалады. Шоттарды тұтынушыларға таратқаннан кейін маркетинг бөлімі қарыз сомасын көрсете отырып, жұмыс орнындағы абоненттердің тізімін жасайды. Бұдан кейін осы тізімдер бойынша ілеспе хатпен бірге бюджеттік және коммерциялық ұйымдардың басшыларына берешекті төлеуге жәрдем көрсету туралы өтініш жіберіледі.
Сондай-ақ дебиторлық берешек деңгейіне тұрақты бақылау және мониторинг жүргізіледі, борышкердің әлеуметтік портретін ескере отырып, жеке өтеу кестесімен келісімдер жасалады. Білім, денсаулық сақтау бөлімдерімен, тұрғын үй қоры секторымен, бюджеттік ұйымдастыру мекемелерімен бірлесіп, берешегі бар қызметкерлердің тізімі жаңартылды.
Отырыс қорытындысы бойынша, осы бағыттағы жұмысты жалғастыру туралы шешім қабылданды. Жауапты ұйымдарға берешекті өтеу кестесін уақтылы жаңарту тапсырылды.
Дана ТАЛҒАТБЕК,
«Семей таңы»
