Президент тапсырмасы аясында
Спорт саласындағы қызметкерлердің жалақысын көтеру мәселесі біраз уақыттан бері қозғалып келе жатыр. ҚР Мәдениет және спорт министрлігінің спорт және дене шынықтыру саласындағы 2021 жылғы қызметі және 2022 жылға қойылған негізгі міндеттері талқыланған алқа отырысында баяндама жасаған Мәдениет және спорт министрі Дәурен Абаев:
«Мемлекеттік білім беру ұйымдарының мұғалімдеріне сабақтан тыс спорттық дәрістер жүргізгені үшін базалық лауазымдық жалақыдан 100 пайыз мөлшерінде қосымша ақы төлеу жүйесі енгізілді. Дене шынықтыру және спорт саласындағы мамандандырылған мектеп пен колледж қызметкерлерінің жалақысы 25 пайызға өсті. Сондай-ақ олардың айлығы 2023 жылға дейін жыл сайын көбейтіліп, 2023 жылға қарай бұл өсім 100 пайызды құрайды»,- деді.
Сонымен қатар Дәурен Абаев вице-министрге чемпиондарды, жүлдегерлерді, сондай-ақ олардың жаттықтырушыларын өмір бойғы материалдық қамтамасыз ету төлемдерінің мөлшерін 100 АЕК-ке, немесе 306 мың теңгеге дейін арттыру мәселесін пысықтауды тапсырған болатын.
Айта кетсек, 2021 жылы спортшылардың допингке қарсы зертханасы мен Ұлттық допингке қарсы орталықтың, дене шынықтыру және спорт бойынша республикалық оқу-әдістемелік және талдау орталығының басқарушы және негізгі персоналдарының жалақы мөлшері лауазымдық жалақыдан 100 пайызға өсті.
Шілде айының басында мәдениет және спорт министрі Дәурен Абаев Түркістан облысының тұрғындарымен кездесу өткізген болатын. Сол кездесуде спортты дамыту мәселесі де талқыланды.
«Біз спорт төрешілерінің еңбекақысын көтеруге бастамашы болдық. Үлкен жұмыс атқарылды. Бұл көптеген судьялар үшін қосымша мотивация болады және мамандықтың беделін арттыруға, жаңа мамандардың келуіне ықпал етеді. Жарыстар сапалы, жаңа деңгейге шығуы керек екені анық. Осылайша, 2024 жылға қарай спорт төрешілерінің жұмысына ақы төлеу 100 пайызға дейін ұлғаяды. Бұл мәселе ұзақ уақыт бойы шешілмей келді», — деді министр Дәурен Абаев.
Төрешілерге жарысқа төрешілік еткені үшін төлемақы беріледі. Төленетін сома төрешілік ету күндеріне де байланысты. Яғни, жарыс бірнеше күнге созылса, төлем жарыстың өтетін күндеріне көбейтіледі. Осы орайда халықаралық санаттағы ұлттық төрешілердің төлемі 2654,6 теңгеден 17697 теңгеге дейін болса, 1 категориялы судьялардың еңбекақысы 1415,8 теңгеден 12388 теңгеге дейінгі соманы құрайды.
«Жалпы, осы күнге дейін жалақы жағынан қиындық көрген жоқпын, еңбекақымыз тұрақты беріледі. Футбол сияқты спорт түріне, жалпы дене шынықтыру, спорт саласына қазіргі кезде өңірімізде үлкен көңіл бөлініп жатыр, бұл, әрине, қуантарлық жағдай. Алдағы уақытта бұл үрдіс тоқтамай, спорт саласы ары қарай дами береді деген үміттемін», — дейді «Алтай» футбол клубының ойыншысы Алпамыс Байғалиев
Ерасыл КЕНЖЕБЕКОВ,
«Семей таңы»
