Жуырда Шығыс Қазақстан облысы әкімдігінде облыс әкімінің міндетін атқарушы Алмасхан Сматлаевтың төрағалығымен кезекті кеңес өтті. Бұл жолғы жиынға ШҚО бойынша Сыбайлас жемқорлыққа қарсы қызмет департаментінің басшысы Денис Шәкенов, облыстың қалалары мен аудандарының әкімдері, сондай-ақ басқарма басшылары қатысты.
Кеңес барысында «Сыбайлас жемқорлықтың алдын алу және оған қарсы іс-қимыл» жобасының үлгілік базалық бағытын іске асыру мәселелері қаралды.
Жиында айтылғандай, Президент Қасым-Жомарт Тоқаевтың мемлекеттік басқаруда жаңа тәсілдерді қолдану туралы тапсырмасы бойынша, сыбайлас жемқорлыққа қарсы іс-қимыл және сыбайлас жемқорлыққа қарсы мәдениетті қалыптастыру шараларын жобалық басқару тәсілі қолданылуда. Ұйымдастырудың бұл моделі — мақсаттарға қол жеткізу үшін жұмысты жоспарлау және ұйымдастыру бойынша жалпыға танылған құрал.
Облыс әкімінің міндетін атқарушы А.Сматлаев дербес басқармалар жұмысының нәтижелерін тыңдап, сыбайлас жемқорлыққа қарсы іс-қимыл бағытындағы шараларды жандандыруды және бұл істе формализмге жол берілмеуі тиіс екенін атап өтті. Әрине, бірлескен күш-жігер арқылы ғана қоғам мен мемлекеттік органдарда сыбайлас жемқорлық көріністерін жоюға болады. Облыста сыбайлас жемқорлыққа қарсы іс-қимылдың жеткіліксіз деңгейде жүргізіліп жатқандығын сыбайлас жемқорлық құқық бұзушылықтардың статистикасынан көруге болады, ол әлі де жоғары деңгейде қалып отыр.
— Бұл жоба сыбайлас жемқорлыққа қарсы іс-қимыл жөніндегі жол картасы болып табылады. Сыбайлас жемқорлыққа қарсы қызметтің бірінші кезектегі міндеті — сыбайлас жемқорлықтың алдын алу және мамандар жергілікті атқарушы органдарға әдістемелік көмек көрсетуге дайын. Қарапайым тілмен айтқанда, мемлекеттік органдар үшін сыбайлас жемқорлыққа қарсы іс-қимыл бағытындағы негізгі міндеттер айқындалды және олардың нәтижелерін тиімді бақылау жүйесі құрылды. Сыбайлас жемқорлықтың алдын алудың негізгі құралдарының бірі — ішкі талдау. Мемлекеттік органдар басшыларының өздері сапалы ішкі талдауға мүдделі болуға тиіс, өйткені бұл болашақта мемлекеттік органдарда сыбайлас жемқорлық көріністеріне жол бермеуге мүмкіндік береді. Басқарушылық қателіктер көбінесе құқықтық олқылықтар мен қақтығыстарға байланысты болады. Тек сапалы талдау ғана алдын алу шараларын уақтылы қабылдауға және мемлекеттік қызметшіні сыбайлас жемқорлықтан қорғауға мүмкіндік береді, — деп атап өтті ШҚО Сыбайлас жемқорлыққа қарсы қызметінің басшысы Д. Шәкенов.
Семинар соңында облыс әкімінің міндетін атқарушы Алмасхан Сматлаев басқарма басшыларына қалалар мен аудандар әкімдері үшін сыбайлас жемқорлық тәуекелдеріне ішкі талдау жүргізу бойынша оқыту семинарын ұйымдастыруды ұсынды.
Дана ТАЛҒАТБЕК,
«Семей таңы»
