Бесқарағай ақыны мен батырын ардақтаған өлке. Бүгін «Туған жер» бағдарламасы аясында Бесқарағай ауданының құрметті азаматы, Қазақстанның «Ерен еңбегі үшін» медалінің иегері, меценат Балтабек Наурызбаевтың демеушілігімен ақын, Қазақ Кеңестік Социалистік республикасының еңбек сіңірген қайраткері, Нұрлыбек Баймұратұлының 135 жылдығына орай ескерткіш ашылды.
Салтанатты шарада аудан әкімі Жарқынбек Байсабыров сөз алып, Нұрлыбек Баймұратовтай жауһар жыр иелерінің есімдері халық жадынан өшпейтінін айтты. Сонымен бірге, туған жерінің алдында перзенттік парызын адал өтеп жүрген Балтабек Нұрғалиұлына алғыс хат табысап, иығына шапан жапты. Өз кезегінде Балтабек Наурызбаев та туған өлкені түлету әрбір перзенттің парызы екендігін тілге тиек етті.
Сондай-ақ, аудан әкімінің алғыс хатымен аталмыш ескерткіштің авторы, есімі аймағымызға кеңінен танымал жерлес мүсінші Нұрбол Қалиев та марапатталды.
Мұнымен қатар, аталмыш салтанатты шара барысында дәл осындай Алғыс хатты Қайрат Тайтөлеуов, Ақылхан Қасқабаев, Қазез Бураханов, Серікжан Айкельев, Мұхаметқали Қасқабаевтар сынды ел азаматтары да иеленді.
Салтанатты шара барысында Қазақстан Республикасының спорт шебері, Бесқарағай ауданының Құрметті азаматы Құмар Мұқашев та сөз алып, тілек білдірді.
Ескерткіштің лентасын қию құрметі ауданның еңбек сіңірген ардагерлері Надежда Ткаченко, Василий Каель және Ләйла Бектиналарға берілді. Осыдан соң қазақы дәстүрмен шашу шашылып, Балтан Елюбаев ақсақал ақ батасын берді.
Жиында сөз алғандар арасында аудандық ардагерлер кеңесінің төрағасы Қизат Қайырханов Нұрлыбек Баймұратұлындай ақынға деген құрмет жас ұрпақ үшін рухани тәрбие екендігін баса айтты.
