«Тұғыры биік Тарбағатай» спорт және өнер фестивалі аясындағы іс-шаралар бағдарламасына сай Ақсуаттағы Ұранқай қажы мешітінің ұйымдастыруымен Құран Кәрімді жатқа және мәнерлеп оқудан Ақсуаттың орталық алаңында облыстық байқау ұйымдастырылды.
Осы өңірде тұңғыш рет өткізіліп отырған, барлық елге үлгі боларлықтай бұл байқауды тамашалауға халық көп жиналды. Байқауға облыс аудандырындағы ауыл мешіттерінен онбесшақты жас имам келіп қатысты. Қазақстан мұсылмандары діни басқармасындағы ғұламалар кеңесінің мүшесі, фәтуа бөлімінің төрағасы Сансызбай Құрбанұлы және Абай облысының өкіл имамы Асқар Әбітайұлы, отыз пара құранды толық жатқа білетін Ербол, Арман қарилар, медрессе директорлары байқауға төрелік етті.
Құран Кәрімді жатқа және мәнерлеп оқу байқауы өте әсерлі болды. Сайысқа қатысқандар арасынан суырылып шыққан бес имамға арнайы жүлделер тапсырылды. Үржардан елген Бейсен, мақаншылық Өтеген, Абай ауданынан келген Ербол, ақсуаттық Ерасыл имам жүлделі орындарға ие болды. Сарапшылар алқасының шешімімен бас жүлде – Мекке қажылығы жүлдесі ақсуаттық жас имам Елдос Жортымовқа табыс етілді. Осы игілікті шараны ұйымдастырушыларға алғыс сезімін білдірген Елдос имам қасиетті Меккеге қажылық жолдамасын өзінің анасы Нәзигүл Құсманқызына тапсырды.
