Өскеменде, Қала күніне орай, Кеңес Одағының Батыры, тәуелсіз Қазақстанның тұңғыш қорғаныс министрі, Халық қаһарманы, армия генералы Сағадат Нұрмағамбетовтің құрметіне саябақ пен ескерткіш ашылады.
Облыс орталығының басшысы Жақсылық Омар тұрғындарға арналған жаңа демалыс аймағының ұйымдастырылу барысын тексеріп, құрылысшылардың жұмысына ризашылығын білдірді,- деп хабарлайды Устинка LIVE тілшісі.
Қазір GEMBA ЖШС мердігерлері субұрқақтардың қондырғыларын реттеп, жаңадан орнатылған шамдарды тексеру, шағын архитектуралық пішіндерді монтаждау және ағаш отырғызу сынды жұмыстарды тиянақтап жатыр. Бұл ретте таза алаңда жаңадан өте әдемі, эстетикалық, заманауи және футуристік нысан пайда болғанын айту қажет. Мердігерлер оны абаттандыру жұмыстарын өткен және биылғы жылдың үш жарым айында ғана қолға алған. Десе де жұмыс қарқыны мен оның сапасы керемет әсер сыйлайды.
– Қазірдің өзінде бәрінің дайын екенін көріп тұрмын, — деді Өскемен қаласының әкімі. – Жарайсыздар, өте жақсы жұмыс істедіңіздер. Қалалықтар демалатын әдемі демалыс орны пайда болды. Халық қаһарманы, армия генералы Сағадат Нұрмағамбетовтің ескерткіші мен саябақтың салтанатты ашылуы облыс орталығының туған күнімен тұспа-тұс келіп тұр. Елестетіп көріңіздерші, Ұлы Отан соғысы кезінде, небәрі 21 жасында ол тұтас бір батальонды басқарды. Демек, біз осы ісіміз арқылы оның ерлігіне құрмет көрсетеміз, – деді Жақсылық Омар.
Есімі ерен тұлғаның мүсіні саябақ аймағының ортасында орнатылған, әзірге оның барлық детальдары ашылу салтанатына дейін арнайы кенеппен толықтай жасырылған. Саябақта үш түрлі түсті субұрқақ бар. Олардың символдық дизайны өте ерекше: дөңгелек, әр деңгейлі субұрқақ ортасында, екі тікбұрышты субұрқақ бүйірлерінде орналасады. Дәуірлер сабақтастығы, тарихи мұра және қаһарман бабаларға деген құрмет бірнеше инсталляциядан анық байқалады, әсіресе көгершіндердің сұлбасы бейнеленген стелла ерекше көз тартады.
Бұл күні тіпті нөсер жаңбырдың өзі әкімнің рейдіне қатысушыларға, журналистердің жасанды нысанның маңайындағы сұлулықты тамашалауына және осы әдемі саябақты жасаушылардың еңбегін бағалауына кедергі болмады.
