AMANAT партиясының ШҚО филиалы жанындағы Экономика, кәсіпкерлік және аграрлық сектор мәселелері бойынша өңірлік қоғамдық кеңестің отырысы өтті.
Жиында «Өркен-КШТ» индустриялық аймағын салу барысы және Мемлекет басшысы Қ.К.Тоқаевтың тапсырмасымен азық-түлік қорларын қамтамасыз ету және әлеуметтік маңызы бар өнімдер бағасының өсуіне жол бермеу мақсатында қабылданып жатқан шаралар туралы мәселе талқыланды.
Осыдан біраз уақыт бұрын Өскемен қаласының индустриялық-инновациялық даму басқармасының үйлестіру кеңесінің жұмыс тобы отырысының қорытындысы бойынша «Тамила Плюс» ЖШС басшылығына индустриялық аймақтың аумағында өндірісін кеңейту туралы инвестициялық жобаны іске асыру үшін ұсыныс енгізілген болатын. Осы ретте кәсіпорындар басшыларынан осы индустриялық аймақта өз жобаларын іске асыруға байланысты ұсыныстар келіп түсуде. Бұл жайында Өскемен қаласы әкімінің орынбасары Арман Искаков мәлім етті.
Кеңес мүшелері «Өркен-КШТ» индустриялық аймағындағы көптеген мәселелердің ұзақ уақыт бойы шешім таппай келе жатқандығын атап өтті.
— Облыста инфляцияға қарсы әрекет ету бойынша шараларды іске асыру шеңберінде «Айналым схемасы» тетігі арқылы 2022-2023 жылдары маусымаралық кезеңге жеміс-көкөніс өнімдерінің бағасын тұрақтандыру үшін 7062,5 тонна көлемінде жеміс-көкөніс өнімдерін жеткізу үшін 1140 млн теңгеге қаржы берілді. Бұл өткен жылмен салыстырғанда 1,1 есе көп. Қант бағасын тұрақтандыру үшін Тараз және Көксу қант зауыттарынан келісіне 430-450 теңге бағамен 28 вагон (1 898 тонна) сатып алу үшін 839 млн теңге мөлшерінде қаражат бөлінді. Қант апта сайын жеткізіледі. Бағаны тұрақтандыру бағдарламасының павильондарында және ірі сауда желілерінде саудаланады, -деді ШҚО ауыл шаруашылығы басқармасы басшысының міндетін атқарушы Рамиль Сағандықов.
— Сіздердің қағаз арқылы берген есептеріңіз бен шынайы өмірдегі көріністер арасында алшақтық көп. Сіздің баяндамаңыздағы ақпараттарға сенсек, онда бәрі тұрақты, бәрі бақылауда. Ал тұрғындар үнемі азық- түлік бағасының қымбаттап бара жатқандығын айтады. Мысалы, әлеуметтік желілерде жүрген бейн материалдарда қант алуға жиналған халықтың қарасы көп, — деді Кеңес мүшесі Сергей Коротин.
Жиында баға тұрақтығын сақтау бағытындағы шаралар жалғаса беретіні айтылды.
«СТ» ақпарат
