Жақында Ақсуат ауданынан бөлініп,
қайтадан құрылған Тарбағатай
ауданының орталығы Ақжар ауылында ерекше шара өтті. Шығыс аймағына
танымал меценат, елжанды азамат
Болат Нұрпеисов Балалар жылында
балақайларға тарту жасады. Кәсіпкер аудан орталығының жаңадан бой көтеріп
келе жатқан шағын ауданында, Әбілхас
Қабдешов атындағы көше бойында, өз
қаражатына балалардың ойын алаңын
салып, тұрғындардың игілігіне табыс
етті.
Ойын алаңының ашылу
салтанатында алғашқы болып құттықтау сөз алған аудан әкімінің міндетін атқарушы
Ерсін Кәдірбекұлы жиылған
қауымды мерекемен құттықтап,
ұзақ жылдардан бері Ақжар
ауылының көркеюіне үлкен
үлесін қосып келе жатқан
Болат Жұмабекұлына ақжарма
алғысын білдірді.
Көршілес Көкпекті
ауданының әкімі Ділдабек
Оразбаев игілікті іс-шараға
қонақ ретінде қатысып, Ақжар
ауылының аудан орталығы
болуымен құттықтап, Болат
Жұмабекұлы сынды туған жерін
түлетіп жүрген азаматтардың
көп болуына тілектестігін білдірді.
Ал көпшілік алдына шыққан
жергілікті ақын С.Сағдолдин
ізгі тілегін өлеңмен жеткізіп,
ардагер, көп балалы ана С.
Бейісбаевамен бірге ойын
алаңының лентасын қиды.
Заманауи стандартқа сай
жасалған балалар алаңында
жазда роликпен, қыста конькимен хоккей ойнайтын алаңы болатын арнайы орынмен қатар,
түрлі ойын жабдықтары да бар.
Ойын алаңының ашылуы жаңадан бой көтеріп
келе жатқан шағын аудан
тұрғындары үшін, әсіресе балалар үшін ерекше тарту болды. Туған жер алдындағы
азаматтық парызын ұмытпай,
әрдайым қарайласып жүретін
Болат сынды азаматтар көп
болғай!..
Талшын ҚАЛИАСҚАР,
«Семей таңы»
