Белоусовка кентінде құрылысы басталған қос көпір елді мекеннің көлік қарым-қатынасын жақсартып қана қоймай, сонымен қатар ауданның дамуына да өз әсерін тигізбек.
«Ауыл — Ел бесігі» мемлекеттік бағдарламасы аясында бөлінген қаражатқа Белоусовка кентінде екі бірдей көпірдің құрылысы басталды. Оның бірі кенттің «Өскемен-Риддер» тас жолы жағынан кіре берісінде екінші көпірдің құрылысы Суворов көшесінің тұсынан салынуда. Аудандық тұрғын үй — коммуналдық шаруашылық, жолаушылар көлігі және автомобиль жолдары бөлімі басшысының міндетін атқарушы Елдар Ыдырышевтың айтуынша, аталмыш өткелдер кенттің көлік логистикасын жақсартып қана қоймай, сондай-ақ ауданның экономикалық дамуына да әсерін тигізбек.
— Белоусовка кентіндегі Суворов көшесінің тұсында екі жолақты көпір құрылысы басталған. Қазіргі уақытта аталған көпірдің аралық тіреулерін орнату жұмыстары жүргізілуде. Атап айтсам, нақты осы уақытта тіреулердің іргетастары құйылатын жерлерді арматурамен тоқу жұмыстары қолға алынған, — дейді №1 жол жөндеу учаскесінің бастығы Сайранбек Темешов.
Ауыл жұртшылығының айтуынша, алдағы уақытта салынатын көпір кент көшелеріндегі көлік ағынын азайтып, елді мекен ішіндегі жолдардың жақсы күйінде сақталуына жағдай жасайтын көрінеді. Сонымен қатар жаяу жүргіншілерге де арналған жолы бар өткел адамдардың өзеннен қауіпсіз өтуіне мүмкіндік бермек.
