Қала әкімі Бақытжан Байахметов Энергетик мөлтек ауданының тұрғындарымен кездесті. Кездесуде жергілікті халыққа болашақта салынатын балалар және спорт алаңы, футбол алаңы, велотұрақтар мен демалыс орындарының егжей-тегжейлі жоспарлау сызбасы таныстырылды. Кербез
ДУЛАТҚЫЗЫ, «Семей таңы»
Биыл Энергетик мөлтек ауданында 4 көшеге орташа жөндеу жұмыстары жүргізіліп, 12 тұрақ орны абаттандырылды. Жаңадан салынатын құрылыс Семей қаласының шет аймақтарын дамыту іс-шаралар жоспарын іске асыру аясында жүзеге асады. — Екі балалар алаңы мен аллея, велотұрақ болады. Қоқыс контейнерлерін кері бағытта орналастырамыз. Біз демалатын орындарды да көп қостық, өйткені мұнда егде адамдар. Орындықтар мен шамдар орнатылады. Энергия үнемдейтін шамдар пульт арқылы қашықтан басқарылады. Олар пәтер иелерінің кооперативі арқылы тұрғындарға таратылады. Шамдардың сөндіру уақытын бағдарламалауға болады — деді мердігер ұйымның өкілі Геннадий Пьянов. Жалпы, шағын ауданда спорт, футбол және балалар ойын алаңдары салынып, орындықтар мен қоқыс жәшіктері орнатылады, жарықтандыру, тротуарларды, демалыс орындарын абаттандыру жұмыстары жүргізіліп, ағаштар отырғызылады. Футбол алаңының ауданы 800 шаршы метрді құрайды. Балалар алаңында ойын кешені мен спорт кешені болады, әткеншек, орындық және де «Сатурн» қоқыс жәшіктері орнатылады. — Алдағы уақытта жарықтандыру, жол жөндеу жұмыстары жүргізіліп, барлық жағдай жасалады, — деді қала әкімі Бақытжан Байахметов.
