Енді ШҚО орталығы Өскеменнің сол жағалауы тұрғындарына тіршілік нәрі жаңа су қабылдағыш құрылғысы арқылы берілетін болады. Қала әкімшілігінің мәліметінше, нысан толығымен автоматтандырылып, 100 мыңға жуық адамды сумен қамтамасыз етпек. Бұл туралы ustinka.kz. тілшісі хабарлады.
Талшын ҚАЛИАСҚАР,
«Семей таңы»
Көлемі бойынша Солтүстік-атаман құрылғысынан кейін екінші болып саналатын жаңа су қабылдағышы құрылысының жүріп жатқанына биыл үшінші жыл. Республикалық және облыстық бюджеттерден қаржыландырылатын құрылыстың құны 3,1 млрд теңгені құрайды.
Меновной ауылы маңындағы Ертіс өзенінің жайылмасында орналасқан жаңа нысан 26 гектардан астам аумақты алып жатыр. Су қабылдағыш сағатына 2000 текше метр суды тартуға қуатты. Алдын ала есептеулер бойынша, су қоры 50 жылға жетеді, бұл қаланың сол жағалауында салынған және қазіргі күні салынып жатқан тұрғын аудандарды толығымен қамтамасыз етуге жеткілікті. Облыс орталығының осы аумағын осыған дейін сумен қамтамасыз еткен 1974 жылы салынған элеватор су қабылдағышы енді мұндай көлемді көтере алмайды.
Қала әкімі Жақсылық Омардың айтуынша, бұл аудандардың тұрғындары су қысымының әлсіздігіне шағымданатын, жаңа су қабылдағышты іске қосқаннан кейін бұл мәселе шешіледі. Жаңа нысан сондай-ақ Қасым Қайсенов, Саратов және Герасимовка кенттерін де сапалы сумен қамтамасыз ете алады.
Айта кету керек, мұндағы барлық жүйе толығымен автоматтандырылған және үш адам — кезекші электрик және сорғы станциясының екі машинист-операторы бір ауысымда жұмыс істейтін болады. Алайда, бұл стратегиялық нысан болғандықтан, мұнда тиісті рұқсат қағазынсыз ешкім кіре алмайды, аумақ 50-ге жуық сыртқы бақылау камералары арқылы бақыланады. Жаңа нысанды іске қосу-жөндеу жұмыстары күзге жоспарланған.
