ЖЕРЛЕСТЕР ФОРУМЫ
10 тамыз — ұлы ақын, ғұлама ойшыл Абай Құнанбайұлының туған күніне орай, еліміздің рухани-мәдени астанасында және Абай облысының барлық өңірінде бірқатар маңызды іс-шаралар жоспарланған. Дәл осы күні Семей шаһарында аймақ басшысы Нұрлан Ұранхаевтың бастамасымен Жерлестер форумы өтеді. Бұл жиында түрлі салада жетістікке жеткен, туған жеріне деген сүйіспеншілігі мен жаңа облыстың дамуына атсалысуға ниеті бар ірі бизнес өкілдері бас қосады.
«ҰЛЫ ДАЛА – ҰЛЫ АБАЙ»
Бұл күні «Ер бірлігі – Жаңа Қазақстан» жобасы аясында Роза Бағланова атындағы «Қазақконцерт» мемлекеттік концерттік ұйымының Абай облысына гастрольдік сапары басталады. «Ұлы Дала – Ұлы Абай» атты концерт облыстық Абай атындағы драма театрында өтеді. Оған танымал эстрада жұлдыздары мен дәстүрлі әншілер қатысады. «Қазақконцерттің» аймақтағы гастрольдік сапары бұдан кейін Курчатов қаласы мен Абай ауданында жалғасады. Сондай-ақ Семейдегі Невзоровтар отбасы атындағы бейнелеу өнері мұражайында «Ұлылар үндескенде» атты көрме ұйымдастырылса, Абай атындағы театрда «Жас Абай», «Қара сөздер», «Ғажайып трагедиясы» атты қойылымдар көрермен назарына ұсынылады.
