Жұмыссыздық – қазіргі таңда өзекті мәселелердің бірі. Биылғы жылдың сәуір айында өткен Үкімет сағатында да осы мәселе көтерілді. Онда Мәжіліс депутаты Альберт Рау ауыл тұрғындарын жұмыспен қамту мәселесіне жеке тоқталды.
Депутат бүгінгі таңда ауылдық жерлерде жұмыспен қамтылғандардың үлесі 3,6 млн адамды құрайтынын, бұл ретте соңғы үш жылда көрсеткіш 2,7%-ға төмендегенін атап өтті. Альберт Раудың айтуынша, көптеген жағдайда тұрғындар кәсіби білім деңгейінің жеткіліксіздігінен жақсы жұмысқа орналаса алмайды. Жастар мен түлектер елдің қозғаушы күші болғандықтан жұмыс орындарының қолжетімділігін арттыру, олардың жұмысқа орналасуына жәрдемдесу маңызды.
Бүгінде осы мәселені шешуге өңірлердегі кәсіпорындар да өз үлестерін қосуда. Жуырда Шығыс Қазақстан облысының Шемонаиха ауданында бос жұмыс орындары жәрмеңкесі өтті. Жәрмеңкеге ШҚО Жұмыспен қамтуды үйлестіру және әлеуметтік бағдарламалар басқармасы басшысының орынбасары Досхан Қайырғазынов қатысты.
Қоныс аударушыларды, жұмыссыз азаматтарды, білім беру ұйымдарының түлектері мен жастарды жұмысқа орналастыру мақсатын көздейтін шараға 13 жұмыс беруші қатысып, бос жұмыс орындарын ұсынды. Қатысушыларға мемлекеттік бағдарламалар жайлы жан-жақты түсіндіріліп, аудандағы кәсіпорындардағы бос жұмыс орындары туралы ақпарат берілді. Жәрмеңкеге келгендер жұмыс берушілермен тілдесіп, болашақ жұмысына қатысты сұрақтарын қойды.
Жәрмеңкеден соң ШҚО Жұмыспен қамтуды үйлестіру және әлеуметтік бағдарламалар басқармасы басшысының орынбасары жұмыс беруші кәсіпорындарға барды. Выдриха, Зевакино ауылдық округтеріндегі мекемелерде, сондай-ақ «Рулиха» ЖШС-нің сүт-тауар фермасында болып, тыныс-тіршілігімен танысты. Кәсіпорындар басшылары оларда еңбек етудің ерекшеліктері мен артықшылықтары туралы егжей-тегжейлі айтып берді.
Дана ДУЛАТҚЫЗЫ,
«Семей таңы»
