ШҚО жолаушылар көлігі және автомобиль жолдары басқармасы соңғы жылдары облыстың қалалары мен аудандары арасында қоғамдық көлік қатынасы неліктен қиындап кеткенін түсіндірді.
Аталған мәселе аймақтық коммуникациялар қызметінде өткен брифингте айтылды.
— Пандемия кезеңі аймақтағы автобус қызметіне кері әсер етті. 2020-2021 жылдары тұрақты маршруттар тоқтатылды немесе шектеулермен жұмыс істеді, қазір олар кезең-кезеңімен қалпына келтірілуде, әсіресе бұл қалааралық маршруттарға қатысты, — деді ШҚО жолаушылар көлігі және автомобиль жолдары басқармасы басшысының орынбасары Айжан Рахымбаева.
Ресми мәліметтер бойынша, қазір облыста үш вокзал, 10 автостанция және 15 қызмет көрсету пункті жұмыс істейді. Өңір бойынша 1000-ға жуық рейстік автобус қатынайды. Тұрақты автобус қатынасымен 318 елді мекен қамтылған.
ШҚО көлік басқармасы басшысы орынбасарының мәліметінше, қазіргі уақытта облыс ішінде барлық бағыттағы қоғамдық көліктер қалпына келтірілген, бірақ олар шектеулі мөлшерде жұмыс істейді. Айжан Рахымбаеваның айтуынша, оған себеп — заңсыз жұмыс істейтін жеке такси жүргізушілерінің белсенділігі.
— Барлық рейстер орындалмайды. Мысалы, Өскемен — Алтай автобус маршрутын алайық. Бұрын ол күніне бес рейс орындайтын, қазір — бір рейс, оның өзі адам толуына байланысты. Негізгі жолаушылар легі заңсыз таксиге ауысты, — деді Айжан Дудубекқызы.
Ол жолаушыларға мұндай тасымалдаушылардың қызметтерін пайдаланғанда түрлі қауіп төнуі мүмкін екенін ескертті:
— Қандай да бір төтенше жағдайлар болған жағдайда, сіз моральдық зиян келтіргені үшін айыппұл талап ете алмайсыз. Психологиялық қақтығыстар болуы мүмкін. Мемлекеттік органдар жағдайды шешуге араласа алмайды, өйткені бұл екі жеке тұлғаның арасындағы келіспеушілік болып саналады.
Айжан Рахымбаева қоғамдық көліктен таксиге көшкен жолаушыларды қайтару жоспарланғанын айтты.
— Қалалық және ауданішілік автобус маршруттарын субсидиялау бойынша жұмыстар жүргізілуде. Ағымдағы жылы облыс бойынша субсидиялау көлемі 3,9 миллиард теңге болды. Әлеуметтік маңызды қатынастар тізімі анықталды, оған облыс бойынша 184 маршрут, оның ішінде 28 қалааралық бағыттар кірді. Бұл шаралар халық үшін қолжетімді тариф деңгейін қамтамасыз етуге және қоғамдық көлікті кезең-кезеңмен жаңартуды бастауға мүмкіндік берді. Бүгінгі таңда 30-ға жуық автобус сатылып алынды. Жыл соңына дейін облыс маршруттарына шығатын тағы 55 автобусты іске қосу жоспарлануда. 2023 жылдың соңына қарай барлығы 120 автобус сатып алу жоспарымызда бар, — деді көлік басқармасы басшысының орынбасары.
Дарья ХАЦАНОВИЧ
