Өткен жұма күні Шығыс Қазақстан облысы мәдениет басқармасының Шығыс Қазақстан лингвистикалық орталығының ұйымдастыруымен, Зайсан ауданы әкімдігінің қолдауымен, Қаз дауысты Қазыбек бидің туғанына 355 жыл толуына орай, «Шешендік шебері» облыстық байқауы өтті.
Байқаудың мақсаты — шешендік өнерді жетік меңгерген жастарды анықтау және қолдау, жастардың шешендік өнерге деген құштарлығын арттыру, сөйлеу шеберліктерін жетілдіру.
18-35 жас аралығындағы алты үміткер бақ сынаған байқау «Сәлем – сөздің атасы» , «Ұлылар сөзі», «Көрініс көрсету», сондай-ақ «Ұшқыр ой» атты төрт кезеңнен тұрды. Байқаудың салтанатты ашылуында облыстық мәдениет басқармасы басшысының орынбасары Роза Төлемісова сөз алып, қатысушыларға сәттілік тіледі.
Жалпы, сайыскерлер, шешендікпен қатар, білім мен тапқырлықтарын да сынға салды.
– Аталған байқау Қаз дауысты Қазыбек бидің туғанына 355 жыл толуына орай ұйымдастырылды. Мақсат — шешендік өнерді меңгерген жастарды қолдап, құштарлығын ояту. Осындай шаралардың жастарымыздың сөйлеу шеберліктерін жетілдіріп, жедел шешім қабылдауға бейімдейтіні сөзсіз, – дейді ұйымдастырушылар.
Байқаудың бірінші кезеңінің шарты бойынша, үміткерлер шешендік өнердің өзіне тән сипаттарын сақтай отырып, өздерін таныстырды, екінші кезеңде ұяшықтардағы қазақтың ұлы ақын-жазушыларына, би–шешендер мен жырауларға арнау өлең шығарса, үшінші кезеңде ұлы тұлғалар, шешен, билердің образына еніп, шешендік өнерлерін көрсетті, ал төртінші кезеңде экранда көрсетілген ұяшықтардағы Қаз дауысты Қазыбек бидің өмірбаяны мен туындыларына қатысты викториналық сұрақтарға жауап берді.
Байқауда көрермендерге есімі жақсы таныс айтыс ақыны — Көкпектіден келген Фархат Маратұлы да бақ сынады. Зайсандық ақын Олжас Шарибаев, күршімдік Елдес Нұрданұлы сынды сайыскерлер де осал қарсылас емес екендерін көрсетті.
Дөп басып, мүдірмей айтқандары бар, кідіріп, ой түбіне бойлағандары бар. Қалай десек те, әр кезеңнің өз ерекшелігі болды.
Байқау қорытындысы бойынша, алты үміткерден алға озған Фархат Маратұлы (Көкпекті ауданы) бас жүлдені жеңіп алды. Бірінші орын Боранбай Төлепбергенге (Зайсан ауданы), екінші орын Күршімнің намысын арқалаған Елдес Нұрданұлына бұйырды. Ал жүлделі үшінші орынды Олжас Шарибаев (Зайсан ауданы) иеленді.
Байқауда топ жарғандар арнайы дипломдармен және бағалы сыйлықтармен марапатталды.
Әділхан ЕСІМХАНОВ
