Күршім
Ел Президенті Қасым-Жомарт Тоқаевтың тапсырмасы бойынша, Балалар жылына орай, балалардың физикалық, зияткерлік, рухани, адамгершілік дамуына ықпал ететін жағдайлар жасау арқылы олардың өмір сүру сапасын жақсарту, балалардың құқықтары мен заңды мүдделерін қорғауды қамтамасыз ету мақсатында Үкімет қаулысымен Балалар жылын өткізу жөніндегі іс-шаралар жоспары бекітілген болатын. Олар 7 бөлім бойынша 50 тармақтан тұрады. Аталған жеті бөлімнің бірі — «Баласын жетімсіретпеген ел» жобасы аясында жетім балалар мен ата-анасының қамқорлығынсыз қалған балалардың құқықтарын қорғау-ға бағытталған іс-шаралар да әр өңірде өткізілуде.
Талшын ҚАЛИАСҚАР,
«Семей таңы»
Бұл жоба өмірлік қиын жағдайда жүрген балаларды қолдау орталықтарының функцияларын кеңейту, жетім балалар мен ата-анасының қамқорлығынсыз қалған балаларды отбасына орналастырудың баламасын, яғни «патронаттық кәсіби отбасын» енгізу бойынша іс-шараларды қамтиды. Қазірде осы жоба аясында балалар үйлері де жұмыстар жүргізуде. Солардың бірі – Күршім ауданындағы «Үміт» балалар үйі. Аталған балалар үйі 1999 жылы ашылған. Қазіргі уақытта балалар үйінде 162 жетім және қамқорлыққа мұқтаж балалар тәрбиеленуде. Мұндағы балалар үйлерге бөлінген, олардың әрқайсысында тәрбиеші ана бар, балалар оларды ана деп атайды. Екі ғимараттың жалпы ауданы 5 шаршы км, асханасы 1,3 шаршы км. Балалар үйінде тек дарынды балалар тәрбиеленуде. Мұнда қосымша білім беру үшін тамаша жағдайлар жасалған — қолөнер, вокал, хореография үйірмелері, спорт секциялары бар.
Бүгінде балалар үйінің тәрбиеленушілері Тайынты ауылындағы лагерьде жазғы демалыстарын өткізуде. Жақында балалардың денсаулығы мен қауіпсіздігін басты орынға қойып отырған Күршім аудандық әкімдігінің қызметкерлері лагерьге арнайы барып, тәрбиеленушілердің жағдайын біліп қайтты.
