10 тамыз — Абай күні. Қазақстан Республикасының мерекелік күнтізбесіне енген бұл күн – ұлы ойшыл Абайды қастерлеп еске алатын күн. Абайдың даналығы мен философиялық көзқарасы сан ғасырлар өтсе де өзінің мəнмаңызын, өміршеңдігін жоймақ емес.
Президент Қасым-Жомарт Тоқаев «Абай және XXI ғасырдағы Қазақстан» атты мақаласында: «Абайды қалай дәріптесек те жарасады. Оның ғибратты ғұмыры мен шынайы шығармашылығы – қазақ халқына ғана емес, жаһан жұртына да үлгі-өнеге. Абайдың адам мен қоғам, білім мен ғылым, дін мен дәстүр, табиғат пен қоршаған орта, мемлекет пен билік, тіл мен қарым-қатынас туралы айтқан ойтұжырымдары ғасырлар өтсе де маңызын жоғалтпайды. Өйткені ақынның мұрасы – бүкіл адамзат баласының рухани азығы»,- деген болатын. Бүкіл елімізде тойланып жатқан Абай күнін мерекелеу шараларынан ақсуаттықтар да шет қалған жоқ. Ақсуат тарихи-өлкетану музейінде «Жүрегімнің түбіне терең бойла» тақырыбымен Абай Құнанбайұлының өмірі мен шығармашылығына арналған танымдық іс-шара дөңгелек үстел түрінде өтті. Мәдени шараға Аксуат ауданы ішкі саясат бөлімінің, аудандық кітапхананың мамандары, оқырмандар қатысты. Іс-шараны осы музейдің әдіскері Мұхтар Өмірбекұлы алғы сөзбен ашты. Абай күнін мерекелеуге арналған басқосуда кітапхана қызметкерлері Ә.Әленов пен А.Азанбеков, аудандық ішкі саясат бөлімінің маманы Л.Сайлаубаева және басқалар қазақтың ұлы ақыны Абайдың өнегесі, шығармаларының ұрпақ тәрбиесіндегі маңызы жайлы ойпікірлерін ортаға салды. Ұлы ойшылдың асыл мұрасы сараланған мәдени шарада Абай Құнанбайұлына және оның шәкірттеріне арналған фотокөрме ұйымдастырылды. Көрмеге Абай Құнанбайұлының ата-бабасының шежіресі, отбасы мүшелері, балалары және Абай атаның замандастары мен шәкірттерінің фотосуреттері қойылды. Абай өмірі мен шығармашылығына арналған кітап көрмесі де ұсынылды. Абай күні мерекесіне арналған шара есте қаларлықтай әсерлі, мазмұнды болып өтті.
Хамза СӘТИЕВ,
«Семей таңы»
