Өткен аптада Семей қаласы әкімінің міндетін атқарушы Димитрий Гариков Дальний, Қазкрай, Березовский, РСУ-1, темір жол вокзалы аудандарының тұрғындарымен кездесті. Кездесуге қалалық әкімдіктің салалық бөлімдерінің басшылары мен қалалық мәслихат депутаттары қатысты
Димитрий Гариков аталған аудандарда атқарылған жұмыстар мен алда тұрған міндеттер туралы баяндап, тұрғындардың өтініш-тілектерін тыңдады. Қала әкімінің міндетін атқарушы Димитрий Гариковтің айтуынша, өткен 6 ай бойынша қаланың әлеуметтік-экономикалық дамуында оң динамика байқалады. Атап айтқанда, өнеркәсіпте 53,5%-ға; агроөнеркәсіптік кешенде 59,3%-ға; саудада 17,6%-ға; негізгі капиталдағы инвестициялар бөлігінде 21,2%-ға; тұрғын үйді пайдалануға беру 7,9%-ға өсім бар. Қазіргі күні қаланың орталық бөлігін орташа жөндеу бойынша конкурстық рәсімдер өткізілуде. Қазкрай ауданында 310,7 млн теңгеге жалпы ұзындығы 5,2 шақырым болатын 9 көшенің жолдарын орташа жөндеуден өткізу жоспарланған. Аталған шағын аудандарда таза ауыз сумен қамтамасыз ету бағытындағы жұмыстар жалғасуда. Бұл аудандарда тұратын 8 мыңнан астам тұрғын ауыз суды «Смычка» су жинағышы арқылы алып отыр. Су құбыры желілерінің негізгі бөлігі 70-ші жылдары салынған, қазіргі күні олардың 68%-ы, кәріз желілерінің 72,2%-ы тозған. Аудандарға жекелей тоқтайтын болсақ, Ақсай кентінде 1,2 млрд теңгеге су құбыры желілері салынды, Березовский кентінде 461 млн теңгеге су құбырының құрылысы басталды. Бұл мақсаттарға 2022 жылы 200,1 млн теңге қарастырылған. Бүгінде аталған аудандарда көше жарығын жаңғырту жұмыстары да жүргізіліп жатыр. Жыл соңына дейін 15 көше жарықтандырылмақ. 2023 жылы Қазкрай мен Березовский кентінде жарығы жоқ тағы 5 көшені жарықтандыру көзделген. Қала әкімінің міндетін атқарушы аудандарда алдағы уақытта жүзеге асырылатын жұмыстардан да хабардар етті. Ақсай кентінде құны шамамен 2,8 млрд теңге болатын 600 орындық орта мектеп салу жоспарда бар. — 2025 жылға дейін 6 мөлтек ауданды дамытуға 4 млрд теңгеден астам қаражат жұмсау жоспарлануда. 600 орындық орта мектеп салынады. Сондай-ақ Алматы көшесінде су құбыры желілерін салу, Ақсай кентінде электрмен жабдықтау, ЕҚДБ аясында 5 көшені жарықтандыру жұмыстары жүзеге асырылады, — деді Димитрий Гариков. Кездесуде тұрғындар жол сапасы, ауыз сумен қамту, жарықтандыру мәселелеріне қатысты сұрақтарын қойып, наразылықтарын білдірді. Тұрғындар қоғамдық көліктің жұмысына да шағымданды, интернет сапасы да нашар. Березовский кентінің тұрғыны жолдар мен арықтардың жағдайына көңілі толмайды. — Өткен жылы біз тұратын Центральная көшесіне қиыршық тас төгілді, бірақ бір жыл уақыт өтсе де бұл көшемен жүру мүмкін емес. Балалардың мектепке баратын уақыты да таяды, ал мына жолмен жүру қиямет. Тағы бір мәселе — 2019 жылы қазылған арық жүйесі. Қазір арамшөп басып тұр, арыққа мал құлап жатады. Балалар ойын алаңына айналдырып алды. «Зеленстрой» ЖШС шақырып, байланыс орнатқандай болдық. Бірақ нәтиже жоқ. Бұл мәселеден Амантай Өтелбаев та хабардар. Жыл сайын арықтағы су көшеге жайылады, оқыс жағдай болмай тұрғанда бұл мәселені қолға алу керек, — деді Кәкен Карипбаев. Сұрақтарға жауап берген Димитрий Гариков биыл көшені асфальттау жұмысы жоспарланбағанын жеткізді. Оның айтуынша, өткен жылғы жоспар бойынша тек арық қазылу керек болған, қалған жұмыстар осы айда қолға алынады. Азат көшесінің тұрғыны бұған дейінгі тұрғындармен кездесуде тұрғын үйлерге 1 маусымнан бастап жарық тартылатыны айтылғанын, бірақ неліктен әлі ешқандай жұмыс жүргізілмей жатқанын сұрады. Димитрий Гариковтің айтуынша, бұл жұмыстарды бір ай ішінде жүзеге асыру мүмкін емес, бүгінгі күні жобалық-сметалық құжаттама дайын, қаржы бөлініп, 10 қыркүйекте жұмыстар басталмақ. Қала әкімі қызметіне кіріскен сәттен бастап қала тұрғындарымен тұрақты түрде кездесулер өткізіп тұрады. Осы кезеңде 182 кездесу, оның 140-ы – қалада, 42-сі ауылдық округтерде өтті. Осындай диалог құру арқылы жиындарда, сондайақ әлеуметтік желілерге мониторинг жүргізу және жазбаша өтініштерді қарау кезінде проблемалық мәселелер анықталады.
Дана ТАЛҒАТБЕК,
«Семей таңы»
