Өткен аптада ШҚО әкімі Даниал Ахметов облыс орталығындағы бірқатар медициналық мекемелерге барып, тұрғындарды толғандырған мәселелермен танысып қайтты. Даниал Кенжетайұлы оларды шешу жолдарын Instagram әлеуметтік желісіндегі жеке парақшасында жариялады.
«Мамандандырылған балалар үйіндегі кір жуатын орынға арналған жабдық жаңартылып, ғимараттың төбесін мамандар тексергеннен кейін, барлық ақаулар жойылатын болады»,- деп жазды Даниал Ахметов.
Ал Қала күніне орай, тұрғындардың өтініші бойынша Протозанов көшесінде учаскелік дәрігерлер мен бейінді мамандар қабылдайтын емхана ашылады. Бұл ғимаратта бұрын балалар тағамы комбинаты орналасқан болатын.
ШҚО басшысы сондай-ақ бұрынғы жедел медициналық жәрдем ауруханасы аумағында орналасқан перзентханада болып қайтты. Пандемия белең алған тұста ол аурухана ретінде пайдаланылды, содан кейін ғимаратта күрделі жөндеу жүргізілді. Бүгінде медициналық мекеме босанған әйелдерді, соның ішінде патологиялары бар әйелдерді қабылдауға дайын.
Ал облыстық онкологиялық орталықта облыс әкімі мамандармен бірге ПЭТ-жабдықты орнату мәселесін қарастырды (ол позитронды-эмиссиялық және компьютерлік томография мүмкіндіктерін біріктіреді және онкологиялық және басқа да ауруларды жоғары дәлдікпен диагностикалауға мүмкіндік береді).
«Екі ғимарат бар және осы заманауи жабдықты қай жерде орнатқан дұрыс екеніне талдау жасалатын болады»,- деп жазды ШҚО әкімі.
ШҚО әкімі сондай-ақ облыстық медициналық орталықта болды. Даниал Ахметовтің айтуынша, мұндагемодиализ үшін қосымша медициналық техника сатып алу қажет, сондай-ақ бөлімшелерде барлық қабылданған нормалар мен стандарттарға сәйкес келу үшін жөндеу жұмыстары жүргізілуі керек.
Бибі ТӨЛЕГЕНҚЫЗЫ,
«Семей таңы»
