Шығыс Қазақстан облысының әкімі Даниал Ахметов жұмыс сапарымен Тарбағатай ауданына барып, мәслихат депутаттарының келісімі бойынша жаңа аудан әкімі Жөргекбаев Дархан Шомпайұлын таныстырды.
— Дархан Жөргекбаев — Ақжар ауылының тумасы, басқарушылық тәжірибесі жоғары, яғни басталған жобаларды жалғастырып, жаңасын бастауға әлеуеті жеткілікті,- деді ШҚО басшысы.
Даниал Ахметов аудан тұрғындарынан жаңа әкімді қолдап, барлық мәселелерді дер кезінде айтуды өтінді. Облыс басшысының айтуынша, тек осындай өзара іс-әрекеттер мен кері байланыс арқылы ғана мәселелерді жедел шешуге болады.
Жұмыс сапары барысында ШҚО басшысы заманауи жабдықтар орнатылған аудандық ауруханаға барды. Аурухана дәрігерлері Израиль мен Литвада тағылымдамадан өткен, бүгінде хирургиялық операциялар жүргізуде.
Даниал Ахметов медициналық мекемені жөндеуге және қосымша жабдықтар алуға бюджеттен қаражат бөлінетінін айтты.
ШҚО әкімі сонымен қатар жаңа мектепте болды. Көптеген шалғай ауылдардағы сияқты бұл білім мекемесінде де интернет жылдамдығын арттыру қажет. Бүгінгі таңда жоба дайын және бұл мәселені шешу үшін антенна-діңгек құрылыстары салынады.
Даниал Ахметов жергілікті жұртшылықпен кездесіп, Тұғыл ауылындағы сумен жабдықтау мәселесін және ауданға отын жеткізу жағдайын талқылады.
— Біз шекара маңындағы аумақтарды және «Бір қабатты Шығысты» дамыту бағдарламаларын іске асыруды жалғастырамыз. Көп балалы отбасыларды тұрғын үймен қамтамасыз етіп қана қоймай, ауданда жұмыс істеуге ниет білдірген жас мамандарға да баспана беріетін боламыз, — деді ШҚО әкімі Даниал Ахметов.
