AMANAT партиясы ШҚО филиалының төрағасы Даниал Ахметовтің тапсырмасымен Өскемен қаласындағы бірнеше мектепке көп балалы, аз қамтылған отбасылардан шыққан балаларды мектеп формасымен, аяқ киіммен, оқулықтармен қамтамасыз ету, сондай-ақ жалпы білім беретін мектептердің жаңа оқу жылына дайындығына байланысты мониторинг жасалды.
Мониторингтік топтың құрамында AMANAT партиясы ШҚО филиалы атқарушы хатшысының міндетін атқарушы А.О.Байжанова, облыстық мәслихат депутаты И.А.Чернышова, Өскемен қалалық мәслихатының хатшысы А.А.Светаш, партияның Өскемен қалалық филиалының атқарушы хатшысы А.К.Есімбекова және AMANAT партиясы ШҚО филиалы жанындағы Отбасы, әйелдер және балалардың құқықтарын қорғау мәселелері бойынша өңірлік қоғамдық кеңестің төрайымы А.В. Масалимова бар.
— Біз мониторинг жасаған Өскемен қаласындағы №49, №48, №46, №6 мектептер бойынша халықтың әлеуметтік осал топтарынан шыққан балаларға көмек көрсету шеңберінде 1500-ден астам оқушы тегін мектеп формасымен және аяқ киіммен қамтамасыз етілетіндігі анықталды. Мемлекеттік қазынадан бөлінетін қаржыға сатып алынатын мектеп формаларының сапасына қатысты сұрақтар да туындауда. Әр мектептегі формалардың сапасы әр түрлі. Мониторинг барысында ата – аналар тарапынан да мектеп формасының сапасына және аяқ киімдердің балалардың өлшеміне сай келмеуіне байланысты мәселелер көтерілуде. AMANAT партиясының өкілдері қаладағы жалпы білім беретін мектептердің жаңа оқу жылына дайындықтарына байланысты мониторинг жүргізу жұмыстарын жалғастыратын болады, — деді AMANAT партиясы ШҚО филиалының атқарушы хатшысының міндетін Айгүл Байжанова.
Тамыз айының 25-не дейін қаладағы барлық мектепте тегін мектеп формасымен және оқуға қажетті құрал жабдықтармен қамтамасыз ету жұмыстары аяқталады. Мониторинг жүргізілген мектептер 2022-2023 оқу жылына толықтай дайын. Мектепте қажетті әрлеу және жөндеу жұмыстары жүргізілген.
Өз тілшіміз
