Еліміздің дамуы, бүгіні мен ертеңі қоғамның қозғаушы күші жастарымызға байланысты. Сондықтан мемлекет жастарға үлкен үміт артып, түрлі бағдарламалар арқылы жан-жақты қолдау көрсетіп келеді.
Талшын ҚАЛИАСҚАР,
«Семей таңы»
12 тамыз — Халықаралық жастар күні. Бұл мерекені біздің еліміз де атап өтеді. Ал шығыстық жастар үшін осы күні өңірде бірқатар шара ұйымдастырылды. Соның бірі — NEET санатындағы жастармен өткізілген кездесулер.
Жалпы, елімізде бүгінгі таңда NEET санатындағы 237 мың жас оқу да оқымайды, жұмыс та істемейді. Бұл туралы Мемлекет басшысы Қасым-Жомарт Тоқаев өткен жылғы қыркүйек айындағы Жолдауында айтқан болатын. Ал былтыр жұрт назарына ұсынылған «Ұлттық рухани жаңғыру» жобасында осы санаттағы жастардың үлесін 5%-ға дейін төмендету міндеті қойылған. Халықаралық жастар күніне орай NEET санатындағы жастармен өткізілген кездесулерде мемлекеттік қолдау шаралары түсіндірілді. Басты мақсат – жұмыссыз жастарға өз кәсіптерін ашуға жәрдем беру.
ШҚО Ақпарат орталығының мәліметінше, қазіргі күні Шығыс Қазақстан облысында барлығы 118 646 жас тұрады. Бұл – жалпы халықтың 16,5 пайызы. 2022 жылдың 1-ші тоқсанының қорытындысы бойынша, облыста 15-28 жас аралығындағы жастардың жалпы санындағы NEET үлесі 6,7 пайызды құрады. Облыста аталған санаттағы жастардың саны 2020 жылдың 2 тоқсанында, пандемия кезеңінде артқан, NEET үлесі 8,6 пайызға жеткен. Бүгінгі таңда көрсеткіштер төмендеуде.
«Қала және аудан әкімдерінің қатысуымен белсенді, дарынды жастармен диалог алаңдары, интеллектуалдық ойындар, волонтерлік және қайырымдылық акциялары, әлеуметтік желілерде челлендждер өтті. Қазіргі уақытта облыста «Еңбек» бағдарламасы бойынша 6 613 адам техникалық және кәсіптік білім алып жатыр. 2022 жылы жұмыссыз жастарға жеке кәсіп ашуға 312 грант беріледі», — делінген Ақпараттық орталық хабарламасында.
Сондай-ақ аталған бағдарламаның «Субсидияланатын жұмыс орындарын ұйымдастыру арқылы кәсіпкерлерді қолдау» бағыты бойынша 1 057 жас жұмысқа орналастырылған. «Дипломмен — ауылға» жобасы аясында 290 жас маманға көтерме жәрдемақы, 112 жасқа тұрғын үй сатып алуға мемлекеттік несие берілген. «Жасыл ел» бағдарламасымен 495 жас азамат жұмыспен қамтылған.
