Өткен аптада қалалық әкімдікте қала әкімі Айбек Кәрімовтің төрағалығымен шағын және орта бизнес өкілдерімен кездесу өтті. Жиынға Семей қалалық мәслихатының хатшысы Бейсенбек Ақжалов, дербес бөлім басшылары, прокуратура мен шағын және орта бизнес өкілдері жиналды. Күн тәртібінде салықты уақытылы төлеу, кәсіпорын қызметкерлерінің жалақы мөлшерін арттыру сынды бірқатар мәселелер қаралды.
Бірінші болып сөз алған қала басшысы соңғы үш жылда қала бюджетінің жергілікті түсім көлемі 3,5 мил- лиард теңгеге артқандығын, өзге өңірлермен салыстырғанда Семей қаласында шағын және орта бизнестің даму қарқыны ойдағыдай екендігін айтты.
Қала экономикасы шағын және орта бизнеске негізделген. Сондықтан болар, салықтың жалпы түсімінің 50 пайызын біздің шаһарда шағын және орта бизнес түсімдері құрап отыр.
— Кіріс мөлшерінің 50 пайызы шағын және орта бизнестің кәсіпкерлік құрылымдарынан түсетін Қазақстанда жалғыз қала – Семей. Шағын және орта кәсіпкерліктер 49 пайыз, жеке кәсіпкерлер 8 пайыз, жалпы, кірістің елу пайызын кәсіпкерлер қала қазынасына құйып отыр,- деген қала әкімі, — қаражаттың жұмсалуына тоқталар болсақ, қаржының басым бөлігін жылу жүйелерін жөндеуге бөлеміз. Сондай-ақ, қала инфрақұрылымын қайта жаңғыртуға, әсіресе, таза ауыз сумен қамту мәселесіне де қомақты қаржы бөлінсе, қала көшелерін әр түрлі деңгейде жөндеуге жылына кем дегенде 1 млрд. теңгеден астам қаражат қарастырылады,- деп атап өтті.
Сондай ақ, Айбек Мүталапханұлы шағын бизнестен түсетін салықтың Семейдің әлеуметтік – экономикалық жағынан дамып, көркеюіне тікелей ықпал ететіндігін де жиналғандар алдында ескеріп өтті. Ол үшін, әрине, әр кәсіпкер салық төлемдерін уақытылы жүргізіп отыруы — заңдылық.
Әр елдің болашағының жарқын болуы оның экономикасына тығыз байланысты. Елбасы Н. Назарбаевтың «алдымен экономика, содан соң саясат» дегені елдің есінде. Бұл орайда Семей қаласы Қазақстанның экономикалық дамуына өзіндік үлесін қосып келеді деп айтуға толық негіз бар.
{jcomments on}-Қазіргі таңда қаламызда 11 ірі өндіріс орыны, 28 мың кәсіпкерлік нысаны бар. Жеке кәсіптерін ашушылар саны өткен жылмен салыстырғанда 1830 адамға артқан. Сондай –ақ, жеке кәсіпкерліктен қала қазынасына түскен қаражаттың мөлшері 7 млрд. 746 млн. теңге көлемінде. Бұл айтарлықтай жақсы көрсеткіш. Қаламыз кенже қалмай, еліміздің қарқынды экономикалық дамуына атсалысып отыр,- дейді Семей қаласы бойынша салық комитеті төрағасының орынбасары Гүлжан Сайрамбаева.
Әлбетте, кәсіпкерлік нысандарының саны көбейсе, халыққа жаңа жұмыс орындары ашылады. Ал, көлемі артып, тасы өрге домаласа, халықтың да тұрмысы түзелетіні белгілі. Биылғы жылдың ақпан айында валюта бағамының өзгеруіне байланысты Елбасымыз Н.Назарбаев кәсіпкерлерге, өндіріс орынының басшыларына жұмысшылардың жалақысын кем дегенде 10 пайызға арттыруды атап тапсырғаны бар.
Бұл жөнінде де Айбек Мүталапханұлы өз ойымен бөлісті.
— Бірнеше кәсіпорында жалақы мөлшері 19 мың, 14 мың, 10 мың, тіпті, 7 және 6 мың теңге деп көрсетілген. Бір жұмыс орыны орташа еңбекақы мөлшерін 4 мың теңге деп көрсеткен. Елестетіп көріңіздерші. Кейбір кәсіпорындар жалақы көлемін дұрыс көрсетпейді. Бұл қалалық бюджетті толықтыру өз дең- гейінде жүріп отырған жоқ деген ойға саяды, — деді өз сөзінде қала әкімі.
Бұл мәселеге байланысты қала әкімі шағын және орта бизнес кәсіпкерлеріне әлеуметтік жауапкершілікті арттыруды қатаң тапсырды.
Әйгерім СӘРСЕНҒАЛИ,
«Семей таңы»
