Шығыс Қазақстан облысы әкімі Даниал Ахметов Шемонаиха және Глубокое аудандарына жұмыс сапарымен барды. ШҚО басшысы өсімдік шаруашылығын дамытып отырған бірнеше ірі шаруа қожалықтарында болды.
Даниал Ахметов ең алдымен Шемонаиха ауданындағы «Еast Farm» шаруа қожалығының тыныс-тіршілігімен танысты. Қожалық жүгері өсірумен айналысады. Жаңа технологиямен жабдықталған суару жүйелерін орнатқан шаруашылық өңірде үлкен экспорттық әлеуетке ие.
Биыл мұнда суармалы жерлерде майлы дақылдарды өсіру технологиясы сынақтан өткізіледі, фермерлер картоп егіп, облыс орталығын осы көкөніспен қамтамасыз етуді жоспарлап отыр, — дейді ШҚО әкімі Даниал Кенжетайұлы.
Даниал Ахметовтің жұмыс сапары Глубокое ауданында жалғасты. Ол өңірдегі «Виситаев Р.Д.» шаруа қожалығына ат басын бұрып, шаруашылық басшысы Тимур Виситаевпен кездесті.
Айта кетейік, «Виситаев Р.Д.» шаруа қожалығы майлы дақылдарды, олардың тұқымдарын, дәнді және дәнді-бұршақты дақылдарды өсірумен, сондай-ақ мал шаруашылығымен айналысады.
Бүгінгі күні шаруашылық астықты кептіретін және сақтайтын үлкен кешен салып жатыр. Кешеннің жұмысымен жақын танысқан облыс әкімі өз таңданысын жасырмады.
— Мұнда заманауи технологиялар енгізіліп, элиталық тұқымдар, атап айтқанда француз бидайы қолданылады екен. Оның өнімі гектарына 60 центнерге дейін жетеді деп жоспарлануда, бұл — өте жақсы көрсеткіш. Мұнда басқа фермерлер келіп, тәжірибе алмасуы керек, — деді Даниал Ахметов.
ШҚО басшысы сондай-ақ үлкен селекциялық жұмыстар жүргізіліп жатқан Шығыс Қазақстан ауылшаруашылығы тәжірибе станциясында болды. Станциядағы мамандар соя, күнбағыс, бидай сұрыптарын өсіруде. Оның басқалардан ерекшелігі – өнімділігі импортталған астыққа қарағанда жоғары болады. Сонымен қатар бұл жерде мал шаруашылығы үшін жем-шөп дақылдары, мысалы құмай өсіріледі. Биыл алғаш рет тәжірибе жүргізу мақсатында мақсары егілген. Бұл өсімдік косметология саласында қолданылады.
— Жалпы, өңірде егін жинау науқаны басталды. 686 мың гектардан өнім жиналатын болады, оның 208 гектардан астамы — майлы дақылдар. Олардың өнімі — біздің ірі май зауыттарымыз үшін шикізат қоры, — дейді облыс әкімі Даниал Кенжетайұлы.
Талшын ҚАЛИАСҚАР,
«Семей таңы»
