Маусым айының 9-18 аралығында Семей қаласының облыстық биологиялық орталығында қосымша білім беру педагогтарының біліктілігін көтеру республикалық курстары болып өтті. Аталмыш шараға еліміздің әр аймағынан келген ұстаздар қатысты. Курстарды ұйымдастырған Білім және ғылым министрлігінің республикалық оқу—әдістемелік орталығы.
Қосымша білім беру мамандарының біліктілігін арттыру курстары Семей қаласының облыстық биологиялық орталығынының негізінде бірінші рет өткізіліп отыр. Маңызды шараға қатысушылардың құрамында мектеп директорлары, білім бөлімдерінің әдіскерлері, мектеп директорларының орынбасарлары мен қосымша білім беру ұстаздары бар.
— Осы жолғы курстың бағдарламасы да ауқымды. Мәселен, балалар мен халыққа экологиялық тәрбие мен білім беру мамандарының біліктілігін арттыру, оқытудың жаңа әдістемелері мен технологияларын үйрену, тұлғаның қалыптасуындағы психологияның маңызын түсіндіру тұрғысындағы жұмыстар жүргізілді. Курстарға еліміздің барлық аймақтарынан жиыны 50-ге тарта адам қатысты. Тағы бір айта кетерлік жайт, педагогтардың теориялық білім деңгейін арттырумен қатар оны іс жүзінде пайдалануға үйрету тұрғысында да көптеген шаралар атқарылды. Қатысушылар біздің орталықтың экологиялық тәрбие мен білім беру бағытындағы жұмыс тәжірибесінде қолданылып жүрген әдістемелерді үйренуге мүмкіндік алды, — дейді биологиялық орталықтың директоры Валерий Дядов.
Өз кезегінде қатысушылар қосымша білім беру мамандарының біліктілігін арттыру курстарының ұйымдастырылу деңгейінің өте жоғары екенін атап өтті. Педагогтар теориялық білімді іс-жүзінде пайдалануға қатысты жақсы әдістемелерді үйренуге мүмкіндік алған көрінеді. Біліктілікті арттыру курстарының маңыздылығы жайлы Солтүстік Қазақстан облысының жас натуралисттер орталығының директоры Ғалым Темірбеков былай деп пікір білдірді:
{jcomments on}- Бірінші кезекте республикалық оқу-әдістемелік орталығына осындай ауқымды шараны ұйымдастырғаны үшін алғыс айтуымыз керек. Өткізілген курстардың мазмұны өте бай болды. Экологиялық тәрбие жұмыстарын жүргізуге қатысты жаңа әдістемелерді меңгердік. Өте үлкен білім қорын жинап, біліктілігімізді шынымен де арттырдық деуге болады. Сонымен қатар, Семей қаласында осындай шараның лайықты деңгейде өткізе білген қалалық білім бөлімі мен биологиялық орталыққа алғысымызды айтамыз.
Республикалық курстардың қорытындысын шығаруға арналған жиынға Семей қалалық білім бөлімінің басшысы Гүлжан Алтынбекова қатысты. Басқосу барысында сөйлеген сөзінде ол қазіргі уақытта қосымша білім берудің қаншалықты маңызды екеніне тоқталып өтті. Сондай-ақ, ол білім беру саласындағы барлық ұстаздармен бірге осы бағытта жұмыс істейтін педагогтардың біліктілігін арттыру күн сайын пайда болып отыратын мәселелерге байланысты міндеттерді шешу үшін қажеттілігін тілге тиек етті.
Жиын барысында қатысушылар қалалық білім бөлімінің басшысына өздерін қызықтыратын сұрақтарын қойып, оларға толыққанды жауап естуге мүмкіндік алды. Ашық әңгіме аясында тағы бір мәрте өзара пікір алмасты. Басқосу соңында тоғыз күн бойы өткізілген республикалық курстардың қорытындысы туралы айтылып, қатысушыларға арнайы сертификаттар табысталды.
Мирас ҚҰСАЙЫН,
«Семей таңы»
