Семей ақпарат орталығында қалалық мәдениет және тілдерді дамыту бөлімінің жарты жылда атқарған жұмыстыраның қорытындысына арналған баспасөз мәслихаты өтті. Бөлім басшысы Берік Көпбаев Семей өңірінде атқарылған мәдени – танымдық іс – шараларға кеңінен тоқталып өтті.
Берік Көпбайұлының сөзіне сүйенсек, жыл басынан бері өңірімізде әр түрлі деңгейде 162 шара ұйымдастырылып, оған 3600-ден астам адам жұмылдырылған екен. Мерекелер мен маңызды іс – шаралар өткізу үшін жыл сайын қала бюджетінен 6 млн. теңге қаражат қарастырылады. Ұйымдастырылатын кештер мен концерттер, іс — шаралардың ішінде ең ауқымдысы — жыл сайын тұрақты түрде өткізілетін көркемөнерпаздар байқауы. Көркемөнерпаздар байқауына қатысушылар қатары да жыл санап артып келеді. Былтырғы жылы 11 мың адам атсалысса, биыл бұл көрскетіш 13 мыңның үстінде. Демек, қала тұрғындары рухани құндылықтар мен мәдени өмірге белсене араласа бастағанын айқын аңғаруға болады.
Тағы бір жаңалық. 1 – шілдеден бастап жаңа «Құнанбай» көркем фильмінің түсірілімі басталады. Бұл жайлы Берік Көпбаев журналистерге толыққанды мағлұмет беріп өтті.
— Көркем фильмнің желісі Құнанбай Өскенбайұлының өмірі, сол кездегі қоғамдағы рөлі жайлы болады. Түсірілім жұмыстары ұлылар мекеніне айналған киелі топырақ Абай ауданында өтеді. Көркем фильмнің режиссері – жерлесіміз Досхан Жолжақсынов. Түсірілім Абай ауданында болғанымен, бұл жұмыста Семей қаласы да техникалық көлікпен қамтамасыз ету, қазақ үй тігу сияқты ауқымды жұмыстарға қолдау көрсететін болады, — деп атап өтті бөлім басшысы.
Сонымен қатар, жиында Ә. Қашаубаев атындағы филармония өнерпаздарының жетістіктері де жіпке тізілді. Толғамбай Сембаев, Серәлі Құсман, Гүлдана Ноғайбаева сияқты өнер майталмандары жуырда Жапония еліне гастрольдік сапармен барып қайтқан болатын. Әншілер сапардан алған әсерлерімен бөлісті.
{jcomments on}- Күншығыс елі өнерді жоғары дәрежеде бағалайтын халық. Әндерімізді ұйып тыңдады. 300 адам жиылған залда өнер көрсеттік. Оның 60-қа жуығы «Болашақ» бағдарламасы арқылы және өзге себептермен шет елде жүрген қазақтар. Барлық концерттеріміз сәтті өтіп, концерт соңында көрермендер орындаған әндеріміздің тақырыбын, мән-мағынасын сұрап жатты. Кейбіреулері, тіпті, қазақ жеріне келіп, елімен танысып, салт-санасын ұғынсам деген пікірлерін білдірді. Жапон халқының арасында Қазақстанға турист болып келіп, Шығыс Қазақстан өлкесінің сұлу табиғатын тамашаласам деген жандар да болды,- деген Толғамбай Сембаев қазақ өнері ғана емес, елі мен жері, табиғаты мен рухани болмысы жапондықтардың қызығушылығын оятқандығы жөнінде тоқталып өтті. .
Баспасөз мәслихатында Орталық саябақтың жай — күйі де сөз болды. Ағымдағы жылдың мамыр айында бірқатар нысандарды жекешелендіру қаулысы шыққан. Ол тізімге Семейдің орталық саябағы да енген көрінеді. Саябақ 2008 жылдан бастап мемлекеттік коммуналды кәсіпорын ретінде жұмыс істеп келеді. Берік Көпбаев 2016 жылға дейін Орталық саябақ жеке меншік қолына өтпейтіндігін, 2016 жылдан кейін де мәселе оң шешімін табатындығын атап өтіп, оған негізсіз алаңдаудың еш реті жоқ екендігін тілге тиек етті.
