Шығыс Қазақстан облысының әкімі Даниал Ахметов азаматтарды жеке мәселелері бойынша онлайн режимінде қабылдады. Облыс басшысына сауал жолдаған тұрғындардың бірі — «Арт спорт» бағдарламасының қатысушысы Әйгерім Қанапина. Оның сұрағы орындалған мемлекеттік тапсырыс үшін берешек мәселесіне қатысты болды. «Арт спорт» — балалардың спорттық және шығармашылық дамуына қатысты бағдарлама. Даниал Ахметовтің айтуынша, мұндай жағдай, өкінішке орай, тек ШҚО-да ғана емес, бүкіл елде де орын алуда. Тамыз айында мәслихаттың кезектен тыс сессиясында миллиардтан астам теңге көлемінде қаражат бөлінеді және бұл қарызды өтеуге ғана емес, жыл соңына дейін, соның ішінде Абай облысында да қызмет көрсетушілердің ақысын төлеуге мүмкіндік береді. Осы бағдарлама шеңберінде барлығы 30 бағыт бойынша 121 шығармашылық үйірме жұмыс істейді. Келесі тұрғын — Александр Чиликин халықты сауықтыру жобасын жүзеге асыру туралы ұсыныс жасады. Ол үшін «Алтай альпісі» базасының жанындағы жерлерді орман қорынан шығару керек. ШҚО басшысы жобаның қызықты екенін атап өтіп, алайда қазіргі күні заң бойынша аталған жерлерді орман қорынан шығару мүмкін емес екенін түсіндірді. «Біз балаларымыз бен қарт адамдарымыз сауықтыру бағдарламаларына қатыса алатындай ынтымақтастықты қарастырамыз»,- дейді Даниал Ахметов. Ал Степное ауылының тұрғыны Нұрлан Жәкежанов ауыз сумен қамтамасыз ету және жолдарды асфальттау мәселелеріне қатысты өтініш білдірді. Даниал Ахметов аталған ауылда сумен жабдықтау жүйесін қайта құру жобасына түзету енгізіліп, оның мақұлданғанын жеткізді. Ал осы жоба іске асырылғаннан кейін бұл елді мекендегі көшелер жөнделетін болады. Көп балалы ана Ольга Антипина облыс басшылығына ризашылығын білдіру үшін хабарласыпты. Көп балалы отбасыға асыраушысынан айырылғаннан кейін жалдамалы пәтер берілген. Келесі жылы Үкімет деңгейінде жалға берілетін тұрғын үйді жекешелендіру мәселесі шешілетін болады. Бұл күні қабылдау барысында ШҚО басшысы сондайақ баспана мәселесіне қатысты бірқатар өтініштерді қарады.
Ерасыл КЕНЖЕБЕК,
«Семей таңы»
