Өткен сенбі күні Тарбағатай ауданында Ақжар ауылының 100 жылдығы мен Қабанбай батырдың 330 жылдығына арналған үлкен той — DARABOZ фестивалі өтті.
Аудандағы мерекелік және спорттық іс-шаралар өтетін Қабанбай батыр атындағы орталық саябақта Ақсуат, Көкпекті, Самар, Шемонаиха, Глубокое, Ұлан, Күршім сынды көрші аудандар және Ақжар, Құйған, Тұғыл, Маңырақ, Жетіарал, Жаңаауыл, Қабанбай елді мекендері ақшаңқан киіз үйлерін тікті. Алаң ортасында жылжымалы сахна құрылды. Жергілікті тұрғындар мен қонақтар қазақтың атақты батыры Қабанбайға арналған театрландырылған қойылымды тамашалады. Фестиваль аясында спорттық сайыстар, қазақ күресі, ауыл іргесіндегі ипподромда аламан бәйге, жаппай көкпар ойыны ұйымдастырылды, өнерпаздар ән мен жырдан шашу шашты.
Республикалық деңгейде өткен қазақ күресіне еліміздің түкпір-түкпірінен келген 36 балуан қатысты. Бас жүлдеге автокөлік тігілді.
Қайтадан құрылған аудандағы алғашқы үлкен шараға Шығыс Қазақстан облысы әкімінің орынбасары Н.Жұмаділов арнайы келіп қатысып, тарбағатайлықтарды құттықтады. ШҚО басшысы Даниал Ахметовтің сәлемін жеткізіп, Тарбағатай өңірінің тың серпінмен дамитынын, халықтың әл-ауқатын жақсарту мақсатында жаңа жұмыс орындары ашылып, жаңа нысандар салынатынын, билік өкілдері халықпен тығыз байланыста жұмыс істейтінін жеткізді.
— Ауданның құрылуы біздің ата-бабамыз Қарекерей Қабанбай батырдың 330 жылдығымен тұспа — тұс келді, өңірдің өсіп-өркендеуіне тілектеспіз. Ауданды дамытудың кешенді жоспарына сәйкес, биыл 1 млрд теңге бөлінсе, Даниал Кенжетайұлы айтқандай, алдағы бес жылда аталған қаражат 5 есеге артады. Сондай-ақ 48 жоба іске асырылып, 7,8 млрд теңге қарастырылады,- деді Н.Жұмаділов.
Ақжардағы тойға жан-жақтан келген жерлестер, ірі бизнес өкілдері аудан экономикасын көтеруге, ауыл шаруашылығын дамытуға қомақты инвестиция салуға әзір екендерін жеткізді.
Фестиваль аясында «Бабалар ерлігі — ұлт мұрасы және ұрпаққа үлгі» тақырыбында ғылыми-теориялық конференция өтті. Хан батырдың ерлігін ұлықтау шарасына белгілі ғалымдар, зерттеушілер мен ақындар — Қазақстан Жазушылар одағының төрағасы Ұлықбек Есдәулет, «Кетбұға — Төлегетай» халықаралық қорының үйлестірушісі Манарбек Мұхамеджанов, философия ғылымдарының докторы, профессор Нұрдәулет Ақыш, әскери тарихшы Қайрат Сағатайұлы, ақын, филология ғылымдарының докторы Жанат Әскербек қатысты.
— Қаракерей Қабанбай қатыспаған бірде-бір ірі шайқас болған жоқ. Ол барлық қиян-кескі шайқастарда болды, 103 рет жекпе-жекке шығып, бәрінде де жеңіске жеткен. Ерлік істерге ұйытқы болған ұлы қолбасшы өз кезеңінде атты әскер соғысының мықты стратегі, жекпе-жектің тендесі жоқ шебері еді. Қабанбай батыр алпыс жыл бойы атқа мініп, қазақ жерін жаудан азат етті, ал жоңғар шапқыншылығы кезіндегі оның ерлігі ұрпаққа үлгі болды, – деді әскери тарихшы Қайрат Сағатайұлы.
Фестивальға жиналған мыңдаған адам Қазақстан Жазушылар одағының төрағасы Ұлықбек Есдәулетовтің өршіл жырларын тыңдап, Шығыс Қазақстан облыстық драма театрының Шалқар Рысханов жетекшілік ететін «Байжігіт» ұлт аспаптар оркестрінің, өнер жұлдыздарының концертін тамашалады.
Тарбағатай төріндегі үлкен той отшашумен аяқталды.
Дана ТАЛҒАТБЕК,
«Семей таңы»
