Биыл Семей қаласының зейнеткерлерге әлеуметтік қызмет көрсететін аумақтық орталығының құрылғанына 25 жыл толады. Мекеменің мерейтойына орай Абай атындағы театрда салтанатты жиын өтті. Шараға қала әкімінің орынбасары Зәуреш Исабаева мен жұмыспен қамту және әлеуметтік бағдарламалар бөлімінің басшысы Қанатжан Төлесбаев, қалалық мәслихат хатшысы Бейсенбек Ақжалов қатысты.
Құрылғанына 25 жыл болған аумақтық орталық осы уақыт аралығында талай белестерден өтті. Алайда, мекеме ұжымы кездескен қиындықтардың барлығын жеңе білді. Қызмет сапасы мен ұжым мүшелерінің қарттарға деген пейілінің нәтижесінде зейнеткерлердің арасында “мейірім үйі” деген атқа ие болды. Лайықты деңгейде әлеуметтік көмек көрсете алатын абыройлы мекемеге айналды. Салтанатты жиын барысында «мейірім үйінің» 25 жылдығын бірге атап өтуге келген жұртшылыққа қазақтың салтыменен шашу шашылды. Содан кейін қала басшысының орынбасары Зәуреш Исабаева аумақтық орталықтың ұжымына, зейнеткерлер мен ардагер қарттарға өзінің лебізін білдірді. Құттықтау сөзінде:
— Қымбатты мерейтой иелері, қымбатты жерлестер Семей қаласының әкімі Айбек Мүталапханұлының атынан, өз атымнан қазыналы қарттарымызға жәрдем көрсетіп, қуат-күшін игілікке жұмсаған Семей қаласының зейнеткерлерге әлеуметтік қызмет көрсету орталығына 25 жыл толуымен құттықтаймын. Қаламызда ширек ғасыр жұмыс атқарып келе жатқан бұл мекеме – мыңнан астам қарттың батасын алған абыройлы шаңырақ. Білгір басшы мен білікті мамандардан құралған бұл ұжым үнемі қаламыздың қоғамды-саяси өміріне де белсене араласып, игі істерімен көз қуанышына айналып келеді, — деген Зәуреш Рамазанқызы орталық ұжымына қаламыздың өркендеу жолында еңбек ете беруіне тілектестік білдірді.
{jcomments on}Аумақтық орталықты 25-жылдық мерейтойымен жұмыспен қамту және әлеуметтік бағдарламалар бөлімінің басшысы Қанатжан Төлесбаев, қалалық мәслихат хатшысы Бейсенбек Ақжалов та құттықтады. Ардагерлер мен қарттарға әлеуметтік көмек көрсетуде аянбай еңбек етіп келе жатқан мекеме ұжымына лебіздерін жеткізді.
— Бүгінгі салтанатты шараға әлеуметтік қызметкерлер де келіп отыр. Мен осы бір мүмкіндікті пайдаланып, оларға алғысымды айтқым келеді. Өйткені, әлеуметтік қызметкерлердің еңбегі өте үлкен. Олардың атқарып жүрген жұмыстарын ерлікке пара-пар дер едім. Құрылған уақыттан бері бір де бір шағым түскен жоқ. Тек қана алғыс айтылып жүр. Бұл да әлеуметтік қызметкерлердің жұмыс сапасының көрсеткіші деп білемін. Мерейтойларыңызбен құттықтай отырып, еңбектеріңізге жеміс тілеймін,- деді Қанатжан Төлесбаев.
Басшысы білікті болмаса қандай болмасын мекеменің жұмысы алға жылжымақ емес. Бұл орайда, аумақтық орталық директоры Галина Дуксумбаева ерекше атап өтуге лайық жан. Мекемені 25-жылдық мерейтойымен құттықтап, басшысының қарттарға, зейнеткерлерге әлеуметтік қызмет көрсету ісінде көп еңбек атқарғанын тілге тиек еткен қалалық мәслихат хатшысы Бейсенбек Ақжалов орталық директоры Галина Қалиқызына ықылас гүлін табыс етіп, құрмет көрсетті.
Шара барысында жиналған жұртшылықтың назарына аумақтық орталық туралы қысқа деректі фильм ұсынылды. Онда мекеменің ең алғашқы құрылған күнінен бастап, 25 жылдық тарихы, бүгінгі жеткен жетістіктері көрсетілген. Салтанатты жиын қаламыздың өнер ұжымдары әзірлеген концертке ұласты.
Мирас ҚҰСАЙЫН,
«Семей таңы»
