Өткен аптада Шығыс Қазақстан облысы Мәдениет басқармасының ұйымдастыруымен ауданда «Мемлекеттік тіл – тәуелсіздік символы» атты облыстық байқау өтті. Байқауға облыстың аудан, қалаларында тұрып жатқан 21-35 жас аралығындағы этнос өкілдері қатысты.
— Біздің өткізіп отырған байқауымыз Қазақстан Республикасындағы тіл саясатын іске асырудың 2020-2025 жылдарға арналған мемлекеттік бағдарламасы аясында ұйымдастырылды. Шараның мақсаты – мемлекеттік тілдің қолданыс аясын кеңейту, қазақ тілінің этносаралық қарым-қатынас тілі ретіндегі қызметін нығайту, мемлекеттік тілді меңгерген белсенді өзге ұлт өкілдерін ынталандыру. Екінші қырынан қарасақ, бұл байқау халқымызды татулық пен достыққа шақырады, — дейді облыстық мәдениет басқармасы басшысының орынбасары Роза Төлемісова.
«Мемлекеттік тіл – тәуелсіздік символы» байқауы мемлекеттік тілді, ұлттық құндылықтар мен тарихты дәріптейді.
Шараның шымылдығы қазақтың дәстүрлі әнімен ашылды. Байқауға қатысушылар төрт кезең бойынша бақ сынасты. Бірінші кезеңде қазылар алқасы үміткерлер ұсынған бейнематериалдарды бағалады. Онда қатысушылардың қазақ тіліндегі сұхбаты, оқу немесе жұмыс орны туралы ақпараты, мемлекеттік тілді дамытуға қосқан үлесі мен білім, спорт және басқа да салаларда жеткен жетістіктері баяндалды. Ал екінші кезеңде сайыскерлер ұяшық таңдап, ондағы берілген тақырыпқа ой толғады. Келесі кезеңде «Жаңа тәуелсіз Қазақстан» тақырыбында эссе жазды.
«Бірлігі жарасқан елден береке қашпайды» демекші, Шемонаиха ауданы — бірнеше ұлт өкілдерінің басын қосқан құтты мекен. Бір қуантарлығы, мұнда мемлекеттік тілді үйренемін деушілер қатары артып келеді.
- Соңғы жылдары байқағанымыздай, басқа ұлт өкілдерінің ішінде қазақ тілін меңгеріп, күнделікті қарым-қатынаста пайдаланғылары келетіндер көбейді. Мектеп, балабақша, Достық үйіндегі шаралардың барлығы қазақ тілінде өтуде, — дейді аудан әкімінің орынбасары Бақытжан Молдаханов.
Сайыскерлер әділ қазылар мен көптің көңілінен шығу үшін барын салды. Төрт кезеңнің қорытындысы бойынша, І орынды қазақ тілінде еркін сөйлейтін Шемонаиха ауданының тұрғыны Юлия Богатырева жеңіп алды. Ал ІІ орын тұғырынан Алтай ауданынан келген Руслан Канцеров көрінді. Жүлделі ІІІ орынды Глубокое және Күршім аудандарынан келген Анна Яковлева мен Анна Иванова қанжығаларына байлады.
Байқау жеңімпаздары арнайы дипломдармен және бағалы сыйлықтармен марапатталды.
Кербез ДУЛАТҚЫЗЫ,
«Семей таңы»
