Жаңа оқу жылының қарсаңында Шемонаиха ауданындағы аз қамтылған, көп балалы, ерекше қажеттіліктері бар отбасылардан шыққан балалар әр түрлі сыйлықтарға ие болды.
Елімізде өтіп жатқан «Мектепке жол» қайырымдылық акциясынан ШҚО әлеуметтік медициналық сақтандыру қорының ұжымы да тыс қалған жоқ. Қор ұжымы балаларды алдағы оқу жылымен құттықтап, оқу құралдары мен киім-кешек табыстады.
— Бүгін біз «Мектепке жол» акциясы аясында көмекке мұқтаж отбасылардағы балаларды келе жатқан мерекемен құттықтадық. Қордың облыстық филиалының ұжымы оқушыларға рюкзактар, аяқ киім, күртешелер, кеңсе тауарларын сыйға тартты. Қазір балаларын мектепке дайындап, керек-жарақтарын түгендеп жатқан ата-аналарға қандай көмек болса да артық болмайды», — дейді ШҚО ӘҚҚ халықты ақпараттандыру және өтініштерді қарау бөлімінің бас сарапшысы Рашида Ташкенова.
«Қуантсаң, баланы қуант» дейді халқымыз. Базарлық алған бүлдіршіндер мәз-мейрам болып, аға-апайларына алғыстарын білдірді. Балалардың қуаныштан бал-бұл жанған жүздерін көргенге не жетсін.
— Медициналық сақтандыру қорының көп балалы отбасыларға көңіл бөліп, 1 қыркүйек қарсаңында сыйлықтар табыстап, ең бастысы, мектепке қажетті құралдарды алып беріп жатқанына алғысымыз шексіз. Біз үйімізге келіп, балаларымызды оқу жылымен құттықтайды деп күткен жоқпыз. Көп рақмет! — дейді көп балалы аналардың бірі.
Еске сала кетелік, «Мектепке жол» акциясы әлеуметтік жағынан қорғалмаған отбасы балаларына қолдау көрсету мақсатында дәстүрлі түрде өткізіліп келе жатыр. Акцияның басты мақсаты жаңа оқу жылына дайындық уақытында аз қамтамасыз етілген және көп балалы отбасылардан шыққан оқушыларға қолдау көрсету, баланың әлеуметтік себептермен мектепке келмей қалуының алдын алу, жетім балаларға, ата – анасының қамқорлығынсыз қалған балаларға, көп балалы, тұрмыс жағдайы төмен отбасыларға нақты көмек көрсету болып табылады.
Ерасыл КЕНЖЕБЕКОВ,
«Семей таңы»
