Тарбағатай өңірінде туған жер алдындағы азаматтық парызына адал азаматтар аз емес екенін Жетіарал ауылының тумалары Мәліковтер әулеті дәлелдеп отыр. Өткен аптада Жетіарал ауылында осы әулеттің демеушілігімен салынған еуропалық стандарттарға сай футбол алаңы пайдалануға берілді. Нысанның ашылу салтанатына аудан әкімі Дархан Жөргекбаев қатысып, құттықтау сөз сөйледі.
— Өздеріңізге белгілі, Президентіміз Қасым-Жомарт Тоқаев өзінің Жарлығымен Абай облысы құрылып, нәтижесінде бұрынғы аудандар қайта қалпына келтірілді. Ақжар ауылы аудан орталығы мәртебесін алды. Ең бірінші, осы қуанышпен баршаңызды құттықтауға рұқсат етіңіздер. Екіншіден, халықтың береке-бірлігінің арқасында Қаракерей Қабанбай батырдың мерейлі тойын ойдағыдай өткіздік. Ауданымыздағы игілікті шаралар бүгін Жетіарал ауылында да жалғасын тауып, ауыл жастарына, жалпы бұқаралық спортты дамытуға таптырмас орын — футбол алаңы қолданысқа берілуде. «Кіндік қаның тамған жерге маңдайыңның тері тамсын» деген тәмсілді берік ұстанған Мәлік атаның ұрпақтары туған жерге тамаша тарту жасап, азаматтығын көрсетті. Бұл бастама басқа да ауылдарда жалғасын табады деген ойдамыз, — деді аудан әкімі Дархан Шомпайұлы.
Салтанатты шарада сонымен қатар ардагер журналист Құсман Игісін, Қазақстанның мәдениет қайраткері, ауданның Құрметті азаматы Сағынбек Ақанов, Тарбағатай ауданының мәслихат хатшысы Асқар Боғырбаев және тағы басқа азаматтар ақ жарма лебіздерін білдірді. Ақжар Мәдениет үйінің өнерпаздары игі шараны әсем әнмен көркемдеп, тұрғындарға мерекелік көңіл-күй сыйлады.
Кербез ДУЛАТҚЫЗЫ,
«Семей таңы»
