Нұрдәулет КӘКІШЕВ,
«Семей таңы»
Өткен бейсенбі күні қалалық Дос-тық үйінде Қазақстан Республикасы Президентінің жанындағы Әйелдер істері және отбасылық-демографиялық саясат жөніндегі ұлттық комиссия БҰҰ-ның даму жөніндегі бағдарламасымен және ШҚО әкімдігімен және қалалық әкімдікпен бірлесіп, жастардың гендердік түсінігін арттыру мақсатында «Гендерлік теңдік әлемдегі прогреске әсерін тигізе ме?» атты тақырыбына көрнекі талқылау және «Гендерлік теңдіктің әлеуметтік-экономикалық дивидендтері» атты тақырыбында пікірталас өткізді.
Жиынға ҚР Білім және ғылым министрлігінің өкілдері, Алматы, Қарағанды және Павлодар облыстарынан келген делегаттар мен Қазақстан Республикасы Президентінің жанындағы Әйелдер істері және отбасылық-демогра-фиялық саясат жөніндегі ұлттық комиссияның мүшелері, қалалық ішкі саясат бөлімінің басшысы Ғалия Смайылова мен қалалық білім бөлімінің басшысы Гүлжан Алтынбекова сынды жергілікті билік өкілдері, үкіметтік емес ұйымдардың басшылары, қаланың белсенді жастары қатысты.
Аталмыш шара барысында қалалық Достық үйінің дәлізінде түрлі ұлттық орталықтардың мүшелері әзірлеген қол өнер бұйымдарының көрмесі өтті. Шара басталмас бұрын БҰҰ-ның даму жөніндегі бағдарламасының кеңесшісі Жанна Жибраевамен және қалалық ішкі саясат бөлімінің басшысы Ғалия Смайы-ловамен сұхбаттасудың реті келген еді.
— Семей өңірінде маңызды саяси оқиға болып жатыр деуге болады. Гендерлік саясат жөнінде бірқатар шаралар өтуде. Соның ішінде «Гендерлік теңдіктің әлеуметтік-экономикалық дивидендтері» тақырыбына жастардың пікірталасы ұйымдастырылуда. Ашық алаңда ойларын ортаға салу үшін түрлі саладағы жастар шақырылып отыр. Жиында жастар тарапынан айтылған пікірлерді қалай жүзеге асыру керектігі туралы сөз болады, — дейді Жанна Жибраева.
{jcomments on}Ал, қалалық ішкі саясат бөлімінің басшысы Ғалия Смайылова:
— Гендерлік саясатты тек әйел адамдарға ғана қатысты деуге болмайды, ол екі жаққа да бірдей. Ал, гендерлік саясат туралы өтіп жатқан бұл шараның мақсаты — әйел затын жоғары көтеру емес, бұл сала бойынша қаламызда қандай жұмыстардың жүргізіліп жатқандығын көрсету. Шара барысында пікір таластырып, сынға түсетін жастардың осы саладағы біліктілігі байқалады, — дейді журналистерге берген сұхбатында.
Жиын барысында БҰҰ Даму бағдарламасы гендерлік жобасының менеджері Рашида Наубетованың кіріспе сөзінен соң, Қазақстан Республикасы Президентінің жанындағы Әйелдер істері және отбасылық-демографиялық саясат жөніндегі ұлттық комиссияның меңгерушісі Салтанат Тұрлыбекқызы сөз алды.
— Қазіргі өркениетті заманда саяси-экономикалық даму бағытына ғана емес, сонымен қатар, әлеуметтік-экологиялық, мәдени салалардың дамуына да мемлекет тарапынан барлық мүмкіндіктер жасалуда. Сол бағыттардың бірі — гендерлік саясат та елімізде өз деңгейінде дамып, біршама жетістіктерге жетіп келеді, -дей келе, — Қазақстанда халықтың гендерлік түсінігін арттыру бойынша нақты жұмыстар жүргізілуде. Оқулықтар, оку-әдістемелік кешендер, құралдар мен балалар кітаптарының тізбесіне гендер бойынша бағдарламалар енгізілген. Жоғары оқу орындарында гендерлік пәндер таңдау бойынша жүргізіледі, — дейді Салтанат Тұрлыбекқызы.
Лауазымды тұлғалардың пікірінен соң жалынды жастардың аталмыш салаға қатысты пікірталас сайысына кезек берілді. Дәлелді мағлұматтарды өз деңгейлерінше жеткізе білген сайыс жеңімпаздары арнайы сыйлықтармен марапатталды.
