Семейлік жұртшылық Мемлекет басшысының 1-ші қыркүйек күнгі Жолдауын ден қойып тыңдады. Ел дамуының алдағы бағытын айқындауда маңызды құжат болып саналатын биылғы Жолдауда атқарылуы тиіс бірқатар маңызды шаралар мен негізгі міндеттер айқындалды.
Бұл күні Семей медицина университетінің оқытушылар құрамы мен студенттер қауымы Президенттің «Әділетті мемлекет. Біртұтас ұлт. Берекелі қоғам» атты Жаңа Жолдауын бірге тыңдады. Биылғы стратегиялық маңызды құжатта ел Президенті атап көрсеткендей, жастарға кәсіби білім беру мен медицина саласына да айрықша көңіл бөлініпті. Осы орайда аталмыш оқу орны қызметкерлері үшін де елеулі міндеттемелер тұр. Мәселен, студенттердің жекелеген, әлеуметтік тұрғыдан аз қамтылған санаттары үшін пәтер жалдауға кететін шығынын субсидиялау мүмкіндігін қарастыру, жоғары оқу орындары жанындағы эндаумент-қорлар білім беру экожүйесін дамытудың негізгі буынына айналдыру сынды шаралар аталмыш университет оқытушыларының назарын аударды.
Сонымен қатар, медициналық жоғары оқу орындарының жанынан көпбейінді ауруханалар және клиникалар ашу, алдағы үш жылда резидентураға бөлінетін грант санын 70 пайызға көбейту, ауыл медицинасын дамыту сынды тақырыптар да аталмыш оқу орны мұғалімдері үшін елеулі жаңалық болды. Бұл ретте медицина университетінің ұстаздар қауымы Мемлекет басшысының Жолдауын бір кісідей қолдайтындықтарын айтуда.
Дәл осындай Президент Жолдауын тыңдау жиыны Семейдің Шәкәрім атындағы университетінде де болып өтті. Шараға қала әкімдігі, зиялы қауым, университеттің профессорлық-оқытушылық құрамы, студенттер, жастар ұйымдарының өкілдері қатысты.
Қатысушылар бұл Жолдаудың да негізгі бағыттары мен басымдықтарына жіті назар аударды. Мемлекет басшысы Қасым-Жомарт Кемелұлы атап көрсеткендей, педагогикалық жоғары оқу орындарын аккредитациялаудың жаңа стандарты қабылданатыны, сондай-ақ, ұстаздардың құзырет аясы айқындалатыны университет ұстаздары үшін ерекше жаңалық болғаны анық.
Басқосу соңында университет оқытушылары жергілікті БАҚ өкілдеріне биылғы Жолдаудың негізгі басымдықтары жайлы тұшымды пікір білдірді.
Саяжан КЕЛЕМБЕКОВА,
«Семей таңы»
