Еліміздің тарихында жаңа бір саяси кезең басталғаны баршамызға аян, сол себепті әр жолдауға мемлекетіміздің әр азаматы ерекше назар аударады.
Ел Президентінің бұл Жолдауы еліміздің болашақ дамуы мен ертеңгі күнге бетбұрысын айқындап берді. Жолдауда еліміздің әлеуметтік дамуына, ел тұрғындарының табысы мен жұмыс орындарының сақталуына, денсаулық сақтау саласындағы жоспарлы шараларға баса назар аудару керектігі айтылды. Өзім құқықтанушы болғандықтан «Ұлттық қор-балаларға» деген жобаның іске қосылатынын, 18 жасқа толған әр қазақстандықтың өз қорында қаражаты болатынын қуанышпен қабылдадым.
Сондай-ақ, тәрбиешілердің жалақысын арттыра отырып, оларды аттестациялаудан өткізу керек деген бастамаға да толық қосыламын. Жолдауды тыңдай отырып, педагог құзіреттілігінің қай қоғамда болмасын өзектілігін жоймайтынына тағы бір көз жеткіздік.
Президент бұл Жолдауда жемқорлық мәселесіне тағы да тоқталды. Енді заңсыз жолмен табылған қаражаттың барлығы мемлекеттің игілігіне алынып, мектеп салуға жұмсалады. Осыны заң арқылы реттеуді билік өкілдеріне тапсырды. Бұл жағдай өркениетті елдердің тәжірибесінде бұрыннан бар.
Мұнымен қатар, құқық қорғау органдары саласындағы реформалар құқық жүйесіне оң нәтиже әкеледі деп ойлаймын.
Президенттің ел дамуы үшін жасалатын қадамдарды қадап тұрып айтуы жұртшылықтың көңілінен шыға білді. Бір сөзбен айтқанда, осыған дейін қабылданған маңызды мемлекеттік бағдарламалар мен саяси құжаттардың жалғасы болып табылатын бұл жолғы Жолдау, мемлекет басшысы атап өткендей, ел бірлігін нығайтып, әділетті мемлекет құруда ерекше екпін береді деп санаймын.
Нәзигүл СЛЯМБОЛҚЫЗЫ,
Құқықтанушы,
Семей қаласы.