Тұяқбай Алпысов 1919 жылы 15 мамырда қазіргі Павлодар облысында дүниеге келген. Жастайынан қиындық көріп, зұлмат жылдардың зобалаңын да басынан өткерді. 1939 жылы КСРО мен Финляндия арасындағы өзара түсініспеушілік, келіспеушілік пен құпия қарым-қатынасқа байланысты ұрыста ел іргесін қорғауға аттанған. Фин соғысы Ұлы Отан соғысымен жалғасып, қан майданда Отан үшін қолына қару алып, Украинаны азат етуге қатысқан. Соғыс аяқталған соң, 1946 жылы туған жеріне емес, Семей қаласына келген. Өзге қалаға келген жігіт ағасы сол кездегі «Мереке» базарында бақылаушы, өзге де түрлі қызметтерді атқарған. Қызмет бабында жүріп Қатима Шәкерқызымен танысып, шаңырақ көтерген.
Тұяқбай ақсақал мен марқұм Қатима әже өмірге 7 бала әкеліп, тәрбиелеген. Үшінші баласын киелі шаһардың құрметіне Семейбай деп есім берген. Балаларының барлығы дерлік жоғарғы оқу орындарында білім алған. Екі баласы әскери саланы таңдаса, қалған ұл – қыздары дәрігер, есепші мамандықтарын игерген. Олар еліміздің түкпір-түкпірінде еңбек етуде. Тұяқбай ата бүгінде ұл-қыздарынан 20 немере, 34 шөбере сүйіп отыр. Ұрпақтары Тұяқбай атаның тамырын тереңге жаюда. Немерелерінің біразы бұл күнде өз алдарына отау тіккен. Ал, шөберелерінің алды мектеп жасына жетіп қалған. Ұрпақтарының жетістіктерін айтып тамсанған ақсақалдың сөзіне қарап, кейіпкеріміздің әулеті мәуелі бәйтерек екендігіне көз жеткіздік.
— Ұзақ жасауымның өзіндік сыры бар. Өмір бойы біреуге өкпе, наз, кек ұстамадым. Абай атамыздың «Адамзаттың бәрін сүй бауырым деп» деген қанатты сөзі менің өмірлік ұстанымым болды,- дейді көнекөз қарт. Сондай — ақ, ақсақал қимыл — қозғалыс пен еңбек адамды алға жетелейтін күш, ұзақ жасаудың қарапайым қағидасы дегенді айтады.
— Мен тоқсанның бесеуіне келгенім үшін алдымен Аллаға, екіншіден, келініме алғысымды айтамын. Келінім үнемі «ата-ата» деп әбігерге түседі. Балаларым жағдайымды жасап, келінім күтіп отыр, — деген Тұяқбай ата келінің кішіпейіл мінезін мақтан тұтатындығын жеткізді.
Тұяқбай ақсақалдың өмірлік қосағы 20 жыл бұрын бақилық болған. Қолындағы ұлы Семейбай мен келіні Гүлмира әке алдындағы перзенттік парыздарын орындап отыр. Бүгінде өзі де әже атанып отырған келіні Гүлмира Жұмағазықызы атасы жайындағы өз ойымен бөлісті.
— Атаммен бірге тұрғанымызға 34 жыл болды. Балаларын тура жолға тәрбиелеп отырады. Өтірік айтқанды жек көреді. Атамыз жылдам, шапшаң адам. Әрдайым жүзі жарқын, көңілді жүреді. Ата-енемізден көп тәлім-тәрбие алдық,- дейді Гүлмира апай.
{jcomments on}Жастық шағындағы еңбегі мен ерлігі елеусіз қалмады. Тұяқбай ата «Қызыл жұлдыз» ордені, «Украинаны азат еткені үшін» медалі, «Ұлы Отан соғысы» ордені, «Астананың 10 жылдығы» медальдарымен марапатталған. Қазіргі таңға дейін өзі елу жыл қызмет еткен «Мереке» базары ардагерін ұмытпай, мереке сайын құрмет көрсетіп отырады екен.
«Семей таңы» газетінің құрдасы әңгімесенің соңында «Елімізде бейбітшілік болсын. Біз көрген бейнетті ұрпақтарымыз көрмесін. Ашық аспан астында тату-тәтті ғұмыр кешіп, еліміз дамып, өркендей берсін», — деп ақ тілегін білдірді.
