Қазақстан Республикасының Президенті
Қ.К. Тоқаевқа
Аса мәртебелі Қасым-Жомарт Кемелұлы!
Өзіңіздің асқан құрметіңіз бен тағдыршешті қадамыңыздың арқасында жаңадан құрылған Абай облысы елдік мүдде жолындағы әр бастама, әр қадам, әр парасат-пайымыңызды мұқият сүзіп, кемел болашағына нақты бағдарын айқындап отырады.
Ұлылар мекеніндегі ел-жұрт Өзіңіздің толғамды ойларыңыз бен батыл қадамдарыңыздан рух алып, келешегіне нық қарайды десек, артық айтқандық емес! Бұл – елдің сөзі!..
Бүгін біз – Абай облысының қоғамдық кеңесі – осынау ой-толғамдарыңызды тағы бір мәрте қуаттап алдық. Сіз, кезекті рет, ел мүддесі, уақыт тынысы, заман талабы, ұрпақ болашағы жолындағы тарихи байламыңыз бен Жаңа Қазақстанымыздың одан әрі өркендеп, дамуына тың серпін беретін, нақты ұсыныстарыңыз бен тапсырмаларыңызды бердіңіз.
Бұл – демократиялық даму жолын таңдаған қазақстандық қоғамды жаңартып, жаңғыртудың, уақыт күттірмес, негізгі талабы деп білеміз!
Күрделі геосаяси сын-қатерлер тоғысында, дамудың жаңа кезеңіне бағыт беретін, эволюциялық жаңғыру тұжырымдамасы халқымыз үшін Стратегиялық бағдар.
Сол себепті, Абай елі барлық бастамаларыңызды қызу қолдап, хакім тілімен айтқанда «пайда ойламай, ар ойлап», жұмылған жұдырықтай бірге болуға мүдделі.
Біз – азаматтық институт өкілдері ретінде қоғам алдындағы тарихи міндет, қастерлі парыз, зор жауапкершілігімізді сезінеміз. Біздің жұмыстарымыздың негізгі мақсаты билікпен үндес. Ол – халықтың жайы. Тұрмысы. Өмір сапасы. Ертеңгі күнге деген зор сенімі…
Сондықтан, әрқайсымыз аянбай еңбек етуге әзірміз.
Жолдауыңызды асқан ыждахатпен тыңдап, ойымызды қорыта келгенде, құжатты Халық үшін, Халыққа арналған, Халықтық Жолдау деп жоғары бағалаймыз!
Алыптың қуатын бойына жиған халқыңыз Сізбен бірге Әділетті Қазақстанның берік іргесін қалайды, сеніңіз! Біз Сізбен біргеміз!
Біздің мақсат – ұрпағымыз туған халқын Абайша сүйіп, еліміз үшін Абайша күйсе – деген ой. Сонда ғана болашақ жарқын болары хақ!
Ылайым, Ұлы Абайдың асқақ рухы, бойыңызға қуат беріп, Отанымызды ұлы мұратқа жетелей беріңіз!
Бұл хатты Абайды тудырған қасиетті елдің Өзіңізге деген ерекше ілтипаты, шексіз алғысы мен ақ батасы деп қабылдаңыз!
Зор құрметпен,
Абай облысы Қоғамдық кеңесінің атынан,
Кеңес төрағасы
Мейрамхат Айнабеков
