Семейдегі Әлихан Бөкейхан атындағы университеттің бас ғимаратында бизнесті қорғау тақырыбында арнайы форум болып өтті.
Аталмыш шараға облысымыздағы мемлекеттік органдар қызметкерлері мен басқарма басшылары, аудандардан келген шағын және орта бизнес өкілдері қатысты.
Сонымен қатар, Абай облысы прокуратурасының басқарма басшысы Олжас Қалматаев төрағалық еткен жиын барысында аймағымыздағы кәсіпкерлік саласына қатысты көптеген өзекті мәселелер қатары ортақ талқыға түсті.
Форум модераторы ШҚО Кәсіпкерлер Палатасы директорының орынбасары Әлия Мұқашева жаңадан құрылып жатқан облысымыздағы кәсіпкерлікті дамыту, қорғау мәселелері және оларды шешу жолдары жайында сөз өрбітіп, форум қонақтарына кезекпен сөз беріп отырды.
Еркін микрофон форматында өткен алқалы жиында әр кәсіпкер кезек бойынша сөз алып, өзін толғандырған өзекті мәселелерді ортаға салу арқылы құзырлы органдар өкілдерінен тұшымды жауап ала алды.
Айта кету керек, Мемлекет басшысы Қасым-Жомарт Тоқаевтың Қазақстан халқына арнаған Жолдауының аясында қазіргі таңда еліміздегі тәрізді аймағымыздағы бизнесті қорғаудың экожүйесіне де елеулі түрде көңіл бөлінуде. Аталмыш форум соның бір айғағы екендігі анық.
Бүгінгі таңда еліміздің барлық өңірлерінде кәсіпкерлік саласын қорғауға жіті назар аударылуда. Мемлекеттік уәкілетті және құқық қорғау органдары өкілдерінің қатысуымен облыстар мен өңірлер прокурорларының тоқсан сайынғы кездесулері өтуде.
Ал, кәсіпкерлер мүддесін көздейтін аталмыш форум алдағы уақыттарда тұрақты түрде өткізілетін болады.
Саяжан КЕРІМБЕКОВА,
«Семей таңы».
